चैत्रचाहुलीचं पाहिलं पाऊल म्हणजे आपला गुढीपाडवा. या दिवशी नेमके कोणते कपडे घालायचे, नटूनथटून तयार व्हायचं, याची तयारी बरीच आधीपासून सुरु असते. गुढीपाडवा झाल्यानंतर आता उन्हाळ्यात लग्नसराईचाही मौसम येईल. अशावेळी तुमचा लुक एकदम झक्कास बनवण्यासाठी खास टिप्स दिल्या आहेत, फॅशन डिझायनर नचिकेत बर्वे यांनी...
मुलींसाठी
आता हळुहळु उन्हाळा जाणवू लागला आहे. त्याचा विचार करूनच आपल्याला कपडे निवडावे लागतील. म्हणून लाइट पिच, अबोली, अॅक्वा ब्लू आणि राणी रंग या सीझनमध्ये छानच सूट होऊन जातील. तुम्ही गौरवर्णीय असाल तर पेस्टल कलर म्हणजे अॅक्वा ब्लू, पिच कलर तुम्हाला सूट होतील. तुम्ही रंगाने सावळ्या असाल तर अबोली, गुलाबी रंगाचा ड्रेस तुमच्यावर खुलून येईल. अनारकली निवडताना त्या अँकल लेन्थपर्यंतच्याच घ्या.
तुम्हाला कुर्ती घालायची असेल तर लांब स्ट्रेटकट कुर्तीला प्राधान्य द्या. पण यावर नेहमीच्या चुडीदारपेक्षा पलाझो पँट्स घातल्या तर तुमचा लूक हटके होईल.
साडी हा कधीही उत्तमच. फक्त तुम्हाला त्यामध्ये काहीतरी गंमत आणता आली पाहिजे. यावेळी तुम्ही नेहमीच्या नेटसाडीपेक्षा जॉर्जेट किंवा शिफॉन साडीचा पर्याय ट्राय करू शकता. सकाळी पुजेसाठी तुम्हाला साडी नेसायची असेल तर चंदेरी किंवा मलमलची साडी नेसू शकता.
साडी नेसताना विरुद्ध रंगाचंच ब्लाउज असेल याची खबरदारी घ्या. एम्ब्रॉयडरी असेल तर उत्तम. साध्या ब्लाउजपेक्षा बॅकलेस, की होल बॅक, हायनेक ब्लाउज ट्राय करा. शर्टसारखा ब्लाउजही तुम्ही ट्राय करू शकता. परंतु अशा वेळी कॉलरवाला नव्हे तर बंद गळ्याचा ब्लाउज असला पाहिजे.
घरच्या घरी प्रयोग करायचा असेल तुमच्या हटके, स्टायलिश ब्लाऊजवर आईची अथवा आजीची पारंपरिक जुनी साडी नेसू शकता. यातून चांगला फ्युजन लूक मिळून जाईल.
तुमच्याकडे गोल्डन आणि लाल रंगाचा एकतरी ब्लाउज असलाच पाहिजे. तो कुठल्याही साडीवर सूट होतो. यापेक्षाही वेगळा लूक हवा असेल तर मोरपिशी साडीवर हॉट पिंक ब्लाउज किंवा गुलाबी साडीवर गोल्डन किंवा हिरव्या रंगाच्या ब्लाउजने एक वेगळा लूक मिळेल.
मुलांसाठी...
कुर्ता आणि त्याच्यावर बंडी हा एकदम स्टायलिश लूक होऊन जाईल. कुर्तीमध्ये इंडिगो ब्लू, मिंट कलर, ब्रिक रेड हे रंग छान दिसतील. क्रीम रंगाचा कुर्ता तर नेहमीच छान दिसतो.
अर्थात या कुर्त्यावर चुडीदार घालणं मस्ट आहे. परंतु हा पाजयमा पठाणी सूटवरच्या पायजम्यासारखा लूज असेल तर बेस्ट. तो लाइट ब्लू किंवा ऑफ व्हाइटमध्ये असल्यास छान दिसेल.
कुर्त्यावर बंडी घालणार असाल तर प्रिंटेज किंवा वुवन फॅब्रिकची बंडी छान दिसेल. प्रिंटेड कुर्ता असेल तर प्लेन बंडी आणि प्लेन कुर्ता असेल प्रिंटेड बंडी हे मात्र कॉम्बिनेशन विसरू नका.
एकदम हटके लूक हवा असेल पँट, शर्ट आणि बंडी हे कॉम्बिनेशनही ट्राय करता येईल. पण हे करताना हे कपडे तीन शेड्समध्ये हवेत. म्हणजे ऑफ व्हाइट पँटवर क्रीम शर्ट आणि लाल रंगाची बंडी किंवा निळ्या रंगाच्या तीन शेड्स तुम्ही या तीन कपड्यांवर ट्राय करू शकता.
सर्वात महत्त्वाचं म्हणजे मुलांनी कितीही छान कपडे घातले तरी त्यांनी नीटनेटकं राहायलाच पाहिजे. चांगला हेअरकट असावा, नखं नीट कापलेली असावीत आणि मुख्य म्हणजे चांगला परफ्युम मारलेला असावा... मग बघा तुम्ही कसे फॅशन आयकॉन दिसता ते.
मोबाइल अॅप डाउनलोड करा आणि राहा अपडेट