उन्हाळ्यात मुलींच्या फॅशनमध्ये कमालीची व्हरायटी असते. त्या तुलनेत मुलांचा उन्हाळा मात्र फारसा ट्रेंडी नसतो. पण यंदा मात्र मुलांच्याही फॅशनने चांगलाच जोर धरलाय. उन्हापासून बचाव करण्यासाठी मुलांसाठीही पर्याय उपलब्ध झाले आहेत. उन्हाळा सुसह्य करण्यासाठी गॉगल्स आणि मास्क यांच्या या व्हरायटीची मार्केटमध्ये उपलब्ध आहेत. मुलांकडूनही याला चांगली मागणी आहे.
गॉगल्स
अॅव्हिएटर - या प्रकारात गोल किंवा अंडाकृती अशी गॉगलची फ्रेम आणि काच आहे. याप्रकाराला जास्त मागणी आहे. अॅव्हिएटरमध्ये ब्लू व्हाइट, रेड ब्राऊन आणि व्हाइट ब्लॅक अशा शेड्सना मागणी आहे. शंभर रुपयांपासून दोन हजारांपर्यंत हे गॉगल्स उपलब्ध आहेत. डोळ्यांना गारवा देण्यासाठी स्काय ब्लू अॅण्ड व्हाइट शेड परफेक्ट ठरते.
स्क्वेअर - या प्रकारात नावाप्रमाणेच स्क्वेअर स्टाइल काच आणि फ्रेम असते. यातील ब्लॅक शेडच्या गॉगल्सला चांगली मागणी आहे. स्क्वेअर गॉगल्स १०० रुपयांपासून १००० रुपयांपर्यंत उपलब्ध आहेत. व्हाइट ब्लॅक, ब्लॅक रेड, ग्रीन व्हाइट या शेड्स यंगस्टर्समध्ये चांगल्या जोर धरून आहेत.
गांधी स्टाइल - तरूणाईला अनेकदा जुन्या वस्तूंबद्दलही आकर्षण वाटते. या आकर्षणची क्रेझ पार गॉगल्सपर्यंत आली आहे. गांधीजींच्या चष्म्याप्रमाणे पूर्ण गोल फ्रेम असलेले हे गॉगल्सही हिट ठरत आहेत. खास फोटोग्राफी आणि फंक्शन्ससाठी याचा वापर होत आहे. १५० ते २५०० रुपयांपर्यंत आहेत.
फ्लॅट - फ्लॅट हा गॉगलचा नव्हे तर तो काचेचा प्रकार आहे. ही काच पूर्णत: सरळ असते. या काचेच्या गॉगलमधून मागील बाजूचे सुध्दा दिसते. तसेच याच्या पुढील बाजूने समोरचं अगदी क्लिअर दिसतं. यंगस्टर्समधून याला मोठी मागणी आहे. ही काच अॅव्हिएटर, स्क्वेअर, क्रोकोडाइल सर्वच फ्रेममध्ये उपलब्ध आहे. याची किंमत २०० रुपये ते ५००० रुपयांपर्यंत आहे. यातील ग्रीन, अॅक्वा, पर्पलल हे तरुणाईच्या आवडीचे कलर्स आहेत.
मर्क्युरी - हा प्रकारही काचेचा आहे. ही काच पुढील बाजूने कलरफुल असते. गॉगल लावणाऱ्याला सगळं त्या कलरच्या शेडचं दिसतं. समोरच्याला मात्र तो गॉगल हा त्या कलरचा दिसतो. या काचेतून समोरच्याला आपले डोळे दिसत नाहीत. एक वेगळी स्टाइल आणि फोटो शूटसाठी या मर्क्युरी काचेच्या फ्रेम्सना जास्त मागणी आहे.
मास्क
काउंटर स्ट्राइक मास्क - हा मास्क मंकी कॅपप्रमाणे असतो. यात संपूर्ण चेहरा झाकला जातो, म्हणजे वेगळी कॅप घालायची गरज पडत नाही. यात मॉन्स्टर्स लोगोच्या मास्कला मागणी चांगली आहे. याची किंमत १२० रूपये ते २०० रुपये अशी आहे.
हाफ मास्क - हा मास्क गळ्यापासून डोळ्यांपर्यंतच असतो. यामध्ये अनेक देशांचे झेंडे, मॉन्स्टर्स, लोगोज् असे चित्र असलेले मास्क आहेत. याची मागणी जास्त आहे. जे हेअर स्टाइल झाकत नाही ते या मास्कला प्रेफर करतात. याची किंमत ७० ते १५० रुपये आहे.
मोबाइल अॅप डाउनलोड करा आणि राहा अपडेट