एकटं राहाण्याविषयी सध्या एखाद्याची काही तक्रार नसली, तरी भविष्यात समस्या उद्भवू शकतात. एका सर्वेक्षणातूनच हे समोर आलंय.
तुम्ही बराच काळ एकटं राहात असाल किंवा वारंवार रिलेशनशिप ब्रेकअप होऊन तुम्ही एकांतात जात असाल, तर सावधान! याचा वाईट परिणाम तुमच्या शारीरिक आणि मानसिक आरोग्यावर होऊ शकतो, असं एका संशोधनातूनच समोर आलंय. त्यामुळे जास्त काळ आनंदी जगायचं असेल, तर अवतीभवती माणसं विशेषतः जोडीदाराची सोबत हवीच!
'युनिव्हर्सिटी कॉलेज लंडन'च्या डॉ. जॉर्ज प्लोबिडिस यांनी या बाबत सर्वेक्षण केलं असून, यासाठी त्यांनी १० हजार लोकांच्या मुलाखती घेतल्या. त्यातून एकटं राहाणं चांगलं नाही, असा निष्कर्ष समोर आलाय. लग्न हे पुरुषांना जास्त मानवणारं असून, घटस्फोटित महिलेनं दुसरं लग्न केलं असेल, तर ती आधीच विवाहित असलेल्या स्त्रीपेक्षा जास्त आरोग्यदायी आयुष्य जगू शकते, असा आश्चर्यकारक निष्कर्षही यातून समोर आलाय.
ज्या स्त्रियांचा विशीत किंवा तिशीत घटस्फोट होतो, त्यांना हृदयविकाराचा धोका जास्त संभवतो, असंही डॉ. जॉर्ज यांच्या निदर्शनास आलं आहे. आरोग्य राखण्यास जोडप्यांचं उत्पन्न महत्त्वाचं ठरतं, असंही हे सर्वेक्षण सांगतं. जी मंडळी लहानपणापासून किंवा वयात आल्यानंतरच्या काळात एकटी राहतात, त्यांना मधल्या टप्प्यात आरोग्याच्या बऱ्याच तक्रारींचा सामना करावा लागत असल्याचं त्यांना दिसून आलं आहे.
माणूस हा समाजप्रिय प्राणी आहे. कुटुंबवत्सल हा गुण त्यातूनच तर त्याच्यात आलेला असतो. ती त्याची गरज असते. त्यामुळे एकटं राहू लागला, तर त्याचे परिणाम जाणवणारच. वयाच्या मधल्या टप्प्यात एकटेपणाचे विपरीत परिणाम जाणवायला लागतात. याला 'सायकोसोमॅटिक सिंड्रोम' म्हणतात. म्हणजे आजारासाठी विशेष कारण किंवा अनुवांशिकता आढळत नाही, तरीही लक्षणं जाणवायला लागतात, असं कौन्सेलर अश्विनी लाटकर सांगतात.
घुसमट होणारच
शिक्षण किंवा करिअरसाठी एकटं राहात असेल, तर त्यातील ध्येय गाठताना एकटेपणा इतका जाणवत नाही. मात्र, हा एकटेपणा दीर्घकाळ राहिला, तर भावनिकदृष्ट्या खचायला होतं. मनातलं बोलण्यासाठी हक्काची सोबत नसल्यामुळे घुसमटही होऊ लागते.
- अश्विनी लाटकर, कौन्सेलर
मोबाइल अॅप डाउनलोड करा आणि राहा अपडेट