आता फेसबुक आणि ट्विटरवरील स्टेटस अपडेट्सवरूनही व्यक्तिमत्त्व ओळखलं जाऊ लागलं आहे.
तुम्ही दैनंदिन आयुष्यात जे अपडेट्स करता, त्यातून तुमचं व्यक्तिमत्त्व ओळखता येऊ शकतं, असा नवा शोध लंडन विद्यापीठानं नुकताच लावला आहे. तुमच्यात आत्मविश्वासाची कमतरता आहे, इथपासून तुम्ही आत्ममग्न आहात, इथपर्यंत तुमच्याविषयीच्या अनेक गोष्टी केवळ या अपडेट्समधून कळू शकतात.
रोमँटिक नात्याविषयी पोस्ट्स असतील, तर तुम्हाला स्वतःविषयीचा पुरेसा आत्मविश्वास नाही.
तुम्ही नात्याविषयी असुरक्षित असाल, तर तुम्ही सतत संबंधित नात्याविषयी अधिकाधिक पोस्ट्स करत राहता. मग ते एखादं जोडीदाराविषयी लाडानं केलेलं विधान असेल किंवा एकमेकांबरोबर घालवलेल्या क्षणांचे फोटो असतील. जोडीदारावर रागावल्यानंतरही त्याला केवळ चांगल्या क्षणांची आठवण देण्यासाठीही जोडीदाराविषयी सकारात्मक पोस्ट्स केल्या जातात, असं अभ्यासकांचं मत आहे. यामुळे स्वतःलाच आपलं नातं खरोखरंच घट्ट आहे आणि सगळं छान होणार असल्याची पुन्हा पुन्हा खात्री मिळते.
स्वतःच्या कामाविषयी बोलत असाल, तर तुम्ही आत्ममग्न आहात.
कामाच्या ठिकाणी मिळालेली बढती किंवा पाच किलोनं तुम्ही मेहनतीने घटवलेलं तुमचं वजन... यांसारख्या गोष्टी पोस्ट म्हणून शेअर करत असाल, तर तुम्ही स्वतःमध्येच गुंतलेले आहात. अर्थातच, हे तुम्ही मित्रमंडळी आणि नातेवाईकांनी लाइक किंवा शेअर करावं, त्यावर कमेंट करावी, यासाठीच केलेलं असतं. अभ्यासकांच्या मते, यावर तुमची मित्रमंडळी जेव्हा तुम्हाला पाठिंबा दर्शवणाऱ्या कमेंट्स करतात, तेव्हा मनातून त्यांना तुमच्या अहंकारी आणि स्वतःचविषयी पालुपद लावण्याच्या स्वभावाचा राग आलेला असतो.
जागतिक प्रश्न आणि सार्वजनिक समस्यांविषयी तुम्ही बोलत असाल, तर तुम्ही मनमोकळे आणि उत्सुक आहात.
बातम्या, राजकारण आणि जागतिक समस्यांविषयी बोलणारे लोक सर्वसामान्यपणे मोकळ्या वृत्तीचे आणि कल्पक असतात. ही माणसं व्यक्तिगत आयुष्याविषयी फारच कमी माहिती ऑनलाइन शेअर करतात. लोकांच्या सहभागातून, मतांतून आणि संवादातून होणारी जगातील विविध विषयांवरील चर्चा त्यांना अपेक्षित असते.
कौटुंबिक आणि मुलांविषयीच्या तुमच्या पोस्ट्स असतील, तर तुम्ही सद्सद्विवेकबद्धीशी प्रामाणिक आणि जबाबदार आहात.
मुलांच्या कौतुकानं भरलेल्या, त्यांनी केलेल्या खोड्या सांगणाऱ्या आणि त्यांचे फोटो शेअर करणाऱ्या पोस्ट्स ज्यांच्या असतात, त्या व्यक्ती बहुतांशी नियोजनबद्ध काम करणाऱ्या आणि मेहनती असतात. ही माणसं जास्त वेळ सोशल नेटवर्किंग साइट्सवर घालवत नाहीत. मात्र, ते ऑनलाइन येतात, तेव्हा मुलांविषयी काहीतरी बोलल्याशिवाय त्यांना राहवत नाही. स्वतःकडे लक्ष खेचलं जावं, यासाठी पोस्ट्स करणारी ही माणसं नसतात आणि फारच कमी वेळा या व्यक्ती एखाद्याबद्दल वाईट बोलतात.
फोटो अपडेटविषयी...
सर्वाधिक सेल्फी अपलोड करणाऱ्या व्यक्तींना स्वतःच्या फिगरबद्दल पराकोटीचा आत्मविश्वास असतो आणि अर्थातच त्यांना त्यासाठी कौतुक मिळवण्याची इच्छा असते.
व्यायामाचे फोटो अपलोड करणाऱ्या व्यक्तींचा कल अर्थातच तब्येतीकडे अधिक असतो आणि त्या व्यक्तींना सतत इतरांना प्रेरणा द्यायला आवडतं.
मेमेज अपलोड करणाऱ्या व्यक्तींची विनोदाची कुवत असामान्य असते आणि त्यांना इतरांनाही आपल्या हसण्यात सहभागी करून घ्यायला आवडतं.
मोबाइल अॅप डाउनलोड करा आणि राहा अपडेट