'ही' बरोबरी कशासाठी? - निखिल पवार कीर्ती परचुरे यांचा 'बरोबरीत चूक काय?' हा लेख वाचला. लेख मुलींच्या भावना आणि विचारांचे अधिक खुलेपणाने विश्लेषण करत लिहिला आहे, त्याबद्दल लेखिकेचे आभार. 'एखादी गोष्ट चूक आहे म्हणून करू नये, हे समजवावे,' हे लेखिकेचे म्हणणे अतिशय योग्य आहे. त्या मुली आहेत म्हणून त्यांना रोखणे बरोबर नाही, हे त्यांचे वाक्य खूप आवडले. समाजात असे विचार रुजवणे गरजेचे आहे. या लेखातून काही गोष्टीसुद्धा अधोरेखित झाल्या आहेत. मुलांशी बरोबरी करायची म्हणून शिव्या देणे, दारू पिणे, उशिरा घरात येणे, तोकडे कपडे घालणे इत्यादी मुली करतात असे जे म्हटले आहे, त्यासाठी त्या बंड करतात, नियम आणि रूढी झुगारून देतात, हे निरीक्षण लेखिकेने अचूक पकडले आहे. यात बरोबरी कोणत्या गोष्टीमध्ये करावी, हे समजावणे तितकेच गरजेचे आहे. लेखात इतर काही व्यक्तींनी दिलेले संदर्भ पटावेत असे आहेत. लेख वाचून काही गोष्टी जाणवल्या, त्या म्हणजे मुले करतात म्हणून आम्ही करणार, हा अट्टहास असून त्याला 'बरोबरी करतो' असे म्हणणे चुकीचे आहे. कोणतेही पालक मुलाने मद्यपान करावे, म्हणून प्रोत्साहन देत नसतात. पालकांना मुलग्यांबाबत ही गोष्ट रुचत नसेल, तर मुलींबाबत कसे आवडेल? यात मुले ऐकत नाहीत, जुमानत नाहीत त्याला जर मुली पालकांनी 'मुलगा' असल्यामुळे दिलेली सूट समजत असतील तर ते चूक आहे. अशा कारणासाठी मुलीनी 'बंड' करणे हे हास्यास्पद आहे. 'मुक्तांगण' संस्थेच्या अहवालानुसार सध्या ३५-४० टक्के तरुण मुली सिगारेट-दारूच्या, अंमली पदार्थांच्या आहारी गेल्या आहेत, कित्येक जणी नैराश्यात आहेत. हे खेदजनक आहे. चित्रपट संपतो, गाणी मागे पडतात; परंतु त्यामुळे झालेला परिणाम वर्षानुवर्षे चालतो. आधी फक्त पुरुषांना समजवावे-रोखावे लागत होते, आता समाजाचा आधार, कौटुंबिक व्यवस्थेचा कणा असलेली स्त्री सुद्धा या मार्गावर यावी? मुलींनी का करू नये, यापेक्षा त्यांनी ते करावे का आणि तशी खरेच गरज आहे का, हा प्रश्न विचाराने जास्त सयुक्तिक ठरेल. अशा गोष्टी सांगणे, समजावणे म्हणजे रूढीवादी असल्याचा शिक्का बसणे आहे; परंतु हे खरे आहे. तारतम्य ठेवावे - यशवंत भागवत 'आजचा स्त्रीवाद' हा विभावरी देशपांडे यांचा २६ मेचा लेख अतिशय आवडला. विशेषतः एखादी गोष्ट पुरुष करतात, तर मी का नाही, या भावनेतून केल्यास स्त्री-पुरुष समानतेच्या मूळ कल्पनेलाच सुरुंग लावल्यासारखे होईल, हे चपखल वाक्य. स्त्री अतिशय चिवट, सहनशील असून पुरुषापेक्षा काकणभर श्रेष्ठही असू शकते. असे असले, तरी तिला कमी लेखले जाते. अमेरिकेतही स्त्रियांना समान कामाला समान वेतन दिले जात नाही, ही वस्तुस्थिती आहे. या वृत्तीत बदल व्हायला हवा. दुसरी गोष्ट, शहाणपणाचा मक्ता पुरुषांनाच दिलेला असतो, ही चुकीची विचारधारणा. स्त्री-पुरुष मतभेदाबाबत शात्रज्ञांनी सिद्ध केले आहे, की त्यांच्या मेंदूच्या रचनाच वेगळ्या असतात; म्हणून विचार करण्याची पद्धती वेगळी असते; म्हणून मतभिन्नता असते. खूपदा स्त्रीचे कौटुंबिक सल्ले शहाणपणाचे असू शकतात. स्त्रीने कुठल्याही क्षेत्रात पुरुषासारखी उंच भरारी मारावी; पण तारतम्य हरवू देऊ नये.
मोबाइल अॅप डाउनलोड करा आणि राहा अपडेट