सर जे. जे. इन्स्टिट्यूट ऑफ अप्लाइड आर्ट
'चिऊचं घर होतं मेणाचं, काऊचं होतं शेणाचं' ही गोष्ट तुम्ही लहानपणी ऐकली असेल. याच शेणाचा उपयोग चित्र काढताना केला तर? मल्लिकार्जुन सालीमठ या तरुण चित्रकारानं हा अनोखा प्रयोग केला आहे. कॅनव्हासवर शेण लिंपून नंतर त्यावर अ‍ॅक्रॅलिक रंगांनी चित्र साकारण्याचं काम हा कलंदर चित्रकार करतोय.
कॅनव्हासवर तो शेण, गोवऱ्या यांचा एक-एक थर तो रचतो. मग त्यावर तो त्याला हवं तसं चित्र साकारतो. शेणावर चितारल्या जाणाऱ्या चित्रांच्या माध्यमातून आपल्या देशातला सांस्कृतिक वारसा जपण्याचा त्याचा प्रयत्न आहे. यासाठी त्यानं वडिलांकडून मराठी तर आईकडून कर्नाटकची संस्कृती जाणून घेतली. कर्नाटक संस्कृतीतून प्रेरणा घेत 'गजलक्ष्मी' आणि 'गो पद्म' या चित्रांच्या दोन सीरिज त्यानं साकारल्या आहेत. या सीरिजना नुकत्याच झालेल्या इंडिया आर्ट फेस्टिव्हलमध्ये उत्तम प्रतिसाद मिळाला असून, मुंबईमधल्या अनेक आर्ट गॅलरीजच्या ऑफर्स त्याला येऊ लागल्या आहेत. शेणाच्या मोठ्या चित्रांच्या लघु चित्रकृतींनाही प्रचंड मागणी आहे. त्याच्या या चित्रांना आतापर्यंत प्रफुल्ल डहाणूकर फाऊंडेशनचा राज्यस्तरीय पुरस्कार मिळाला आहे.
आर्ट स्टुडिओ उभारला
इंडिया आर्ट फेस्टिव्हलमध्ये मल्लिकार्जुनसोबत अमरेश्वर हुलगेरी, मल्लिकार्जुन घोडके आणि मल्लिनाथ जमखंडी या तीन कलाकार मित्रांचीही चित्रं होती. या चार तरुणांच्या चार वेगवेगळ्या शैलींतल्या प्रयोगांनी कलाप्रेमींचं लक्ष वेधून घेतलं. मल्लीनाथ जमखंडी यानं मराठमोळी स्त्री तर मल्लिकार्जुन घोडके यानं दाक्षिणात्य नर्तिकांचं सौंदर्य बिंदूवादी शैलीतून साकारलं होतं. तर अमरेश्वर हुलगिरी यानं एका वृद्ध राजस्थानी महिलेचं चित्र चितारलं होतं. त्याच्या या चित्रास प्रफुल्ल डहाणूकर फाऊंडेशनचा राष्ट्रीय पातळीवरील पुरस्कार आणि फेलोशिप मिळाली आहे. सोलापूरच्या या चार तरुण वर्गमित्रांनी अक्षरश: पै अन् पै जमवत या आर्ट फेस्टिव्हलमध्ये सहभाग घेतला. विशेष म्हणजे देशभरातून आलेल्या ५५० हून अधिक कलाकारांमध्ये त्यांनी मानाचं स्थान मिळवलं. मल्लिकार्जुननं तीन कलाकार मित्रांसोबत एक आर्ट स्टुडिओही उभारला आहे.
'आजकाल सगळीकडे कृत्रिम रंगांचाच वापर दिसून येतो. पण, अजंठा-वेरूळ इथलं केवळ नैसर्गिक स्रोत वापरुन केलेलं दगडावरील काम मला प्रेरणा देतं. त्यावरुनच मला शेण लिंपून ही कलाकृती साकारण्याची कल्पना सुचली.'
-मल्लिकार्जुन सालीमठ, चित्रकार
मोबाइल अॅप डाउनलोड करा आणि राहा अपडेट