आजकालच्या बहुतांश तरुणांचं पहिलं प्रेम म्हणजे झोप. वेब सीरिज, चित्रपट किंवा इतर मनोरंजनाच्या माध्यमांनी तरुणाईला इतकी भुरळ घातली आहे की, हाती घेतलेलं काम तडीस नेल्याशिवाय झोपणार नाही असा निश्चय काही जण करतात. मग ही मंडळी रात्ररात्र जागरण करतात. कधी नाइट आऊटमुळे तर कधी एक्स्ट्रा कामाच्या व्यापामुळे झोपायला उशीर होतो आणि सर्वसामान्य लोकांच्या गुड मॉर्निंगच्या वेळी या तरुणांची गुड नाइट होते. पण दुसऱ्या दिवशी ऑफिस आणि कॉलेजमध्ये जावं लागणार असतं, त्यामुळे पहाटे 'गुड नाइट' झाल्यानंतर हाताशी आलेले काही तास झोपायचं आणि ऑफिस किंवा कॉलेजमध्ये 'यार, निंद आयी है' असं म्हणत चहा किंवा कॉफीने झोप उडवण्याचा प्रयत्न केला जातो. पुढे वीकेंडची सुट्टी आल्यावर मस्त ताणून देईन, असं म्हणत सुट्टीची वाट बघायची. त्यामुळे सुट्टी मिळाली रे मिळाली की 'स्लीप इज बे' असं म्हणत 'मला उठवू नका रे' असं घरच्यांना सांगून दुपारपर्यंत मस्त ताणून देतो.
सोशल मीडियावाली झोप
प्रत्यक्ष आयुष्यात जितकी झोप सगळ्यांना प्रिय आहे, तितकीच ती सोशल मीडियावर देखील सर्वांचीच लाडकी आहे. 'आयुष्य खूप सुंदर आहे, फक्त व्यवस्थित झोप मिळाली पाहिजे', 'आज काही तुफानी करु या' असं म्हटलं आणि मग काय? मस्त आठ तास झोप काढली ना भाऊ', 'अ निंद इन नीड इज द निंद इनडीड' यासारखे झोपेवरील विविध मिम्स आपल्यापैकी अनेकांनी सोशल मीडियावर नक्कीच बघितले असतील. याशिवायच 'टॅग करा तुमच्या फ्रेंडलिस्टमधील कुंभकर्णाला' अशा मिममध्ये अनेकांनी त्यांच्या झोपाळू मित्रालादेखील नक्कीच टॅग केलं असेल.
जागते रहो!
परीक्षा सुरु झाल्यावर पूर्ण जगाचा अभ्यास झालाय आणि आपला खूप अभ्यास बाकी आहे असं बहुतांश जणांना वाटतं. त्यामुळे परीक्षा कालावधीत अभ्यास पूर्ण करण्यासाठी भरपूर जण जागताना दिसतात. पुरेशी झोप न झाल्यामुळे लाल झालेले डोळे घेऊन सगळेजण पेपर द्यायला पोहोचतात. रात्रीच्या जागरणामुळे पेपर लिहिताना तर झोप लागणार नाही ना अशी भीती प्रत्येकालाच असते. परीक्षा संपली की, त्या आनंदापेक्षा 'आता मस्त झोप काढणार' याचा आनंद जास्त होतो. याशिवाय 'अर्धा तास पॉवर नॅप घेतोय, अर्धा तास झाला की मला कॉल करून उठव रे' इथपासून ते 'भाई, माझं स्टेशन आलं की मला उठव' असं सांगून ट्रेनमध्ये हळूच एक 'डुलकी' काढणाऱ्यांच झोपेचं वेड खूप अफाट असतं. एकमेकांना झोपेतून उठवताना नकळतंच मैत्रीचे बंधदेखील घट्ट होतात यात शंकाच नाही.
याला म्हणतात नशीब!
झोप हे अनेकांचं पहिलं प्रेम असलं तरीही काही जण झोपेवर एकतर्फी प्रेम करतात, कारण यांना झोप खूप आवडत असली, तरी झोप या महाभागांवर नाराज असते. कितीही लवकर झोपले तरी यांना काही केल्या झोप येत नाही. मग 'द स्ट्रगल इज रिअल' असं म्हणत हे महाभाग 'ती' ची आतुरतेने वाट पाहात असतात. याउलट काहीजणांवर निद्रा देवी भलतीच प्रसन्न असते. अशा नमुन्यांना कुठेही आणि कधीही झोप येते, त्यामुळे 'हम जहा बैठे होते है, निंद आना वहीसे स्टार्ट होता है' असं म्हणत हे नमुने नेहमीच आपली कॉलर टाइट करतात. 'यार, याला म्हणतात नशीब' असं म्हणत झोपेवर एकतर्फी प्रेम असलेले यांचा नेहमीच हेवा करतात.
गंमत काही औरच
झोपेवर नितांत प्रेम करणारे कॉलेजिअन्स झोपण्यासाठी संधी शोधत असतात. अशा वेळी एखादी सुट्टी किंवा नशिबाने हाफ डे मिळाला की, ग्रुपमधील मिस्टर स्लिपींकडून 'आता घरी जाऊन ताणून देणार' असे उद्गार कट्यावर ऐकायला मिळतात. घरी आल्यावर गाढ झोपेत असताना, अचानक एखाद्या मित्राचा फोन येतो आणि झोपमोड होते. अशा वेळी 'आता माझी सटकली' असं म्हणत 'अब से तेरी मेरी दोस्ती खतम' असे गमतीशीर संवाद देखील तरुणाईत होताना दिसतात.
फेकून दे तो फोन!
झोप आवडीची असली तरीही दिवसभरातील ताण आणि कामाच्या किंवा अभ्यासाच्या टेन्शनमुळे कधी-कधी पडल्यापडल्या झोप लागत नाही. आपल्या मुलाला अजून झोप लागली नाही ही गोष्ट आई किंवा बाबांच्या लक्षात आल्यावर, 'हे सगळं तुझ्या त्या स्मार्टफोनमुळे होतंय. फेकून दे तो फोन. मग बघ कशी झोप लागते ते' असे नेहमीचे डायलॉग ऐकायला मिळतात.
प्रेम एक, प्रकार अनेक
झोपेवर प्रेम करणाऱ्यांचे देखील विविध प्रकार असतात. काहीजणांना जुनी गाणी ऐकत झोपायची सवय असते, तर काही जण आवडतं पुस्तक वाचत झोपतात. काहीजणांना उशी घेतल्याशिवाय झोप येत नाही. काही महाभाग एसी लावून पांघरुण घेऊन झोपतात, तर काहीजणांना उपडं झोपल्याशिवाय झोप लागत नाही. काहीजण झोपेचे इतके मोठे चाहते असतात की, एकदा झोपल्यावर सकाळी उठण्यासाठी हे महाभाग दोन दोन मिनिटांच्या अंतराने दहा-पंधरा गजर लावतात. पण कितीही वेगवेगळ्या प्रकारची मंडळी असली तरीही हे आशिक 'निंद ही भगवान है' असं मानणारे असतात हे मात्र नक्की!
मोबाइल अॅप डाउनलोड करा आणि राहा अपडेट