लग्नाची तारीख जवळ येऊ लागली, की भावी वर-वधूंची तयारी जोरात सुरू होते. लग्नाच्या सगळ्या तयारीत आता 'पर्सनॅलिटी ग्रूमिंग'लाही महत्त्व आलं आहे. लग्नसराईचा हंगाम सुरू होत असताना, विवाहसोहळ्यातल्या या नव्या ट्रेंड्वर एक नजर. हर्षल मळेकर लगीनघाई सुरू झाली की खरेदीला जोर येतो. चारही बाजूंनी तयारी सुरू होते. लग्नात सुंदर दिसण्यासाठी भावी वधू-वर 'ब्युटी ट्रिटमेंट'ची पॅकेजेस घेतात. पण, आता तेवढ्यावरच भागत नाही. लग्नासाठी स्वत:चं 'पर्सनॅलिटी ग्रूमिंग' करून घेण्याचा नवा ट्रेंड सध्या पाहायला मिळतोय. विवाहसोहळ्यात सुंदर दिसणं, आकर्षक पद्धतीनं स्वत:ला प्रेझेंट करणं यासाठी 'सेल्फ ग्रूमिंग' करून घेतलं जातंय. त्यासाठी आवश्यक त्या-त्या तज्ज्ञांची मदत घेतली जात असून, हवा तितका खर्चही केला जातोय. आयुष्यात शक्यतो एकदाच येणारा हा दिवस संस्मरणीय व्हावा म्हणून तरुण-तरुणी शक्य ते सर्व करण्यास उत्सुक असतात. या महत्त्वाच्या दिवशी संपूर्ण सोहळ्यात आपला वावर आत्मविश्वासपूर्ण असावा याकडे भावी वर-वधूंचं लक्ष असतं. व्यक्तिमत्व प्रभावी दिसावं यासाठी अगदी बारीकसारीक गोष्टींचा विचार केला जाऊ लागलाय. लग्नाच्या दिवशी आकर्षणाचं केंद्र आपण असणार आहोत हे लक्षात घेऊन, फक्त बाह्य सौंदर्योपचारांवर भर न देता एकूणच 'पर्सनॅलिटी ग्रूमिंग' केलं जातंय. बोलणं, चालणं, उठणं, बसणं, उभं राहणं, हास्य अशा प्रत्येक गोष्टीवर बारकाईनं लक्ष देऊन त्यात आवश्यक ते बदल करण्यासाठी तज्ज्ञ मंडळी मार्गदर्शन करतात. आकर्षक दिसण्याबरोबरच, प्रत्येकाशी आत्मविश्वासानं बोलायचंही असतं. त्याचीही तयारी करून घेतली जाते. या सगळ्या गोष्टींसाठी हजारो रुपये खर्च करण्याची तरुण-तरुणींची तयारी असते, असं वेडिंग प्लॅनर म्हणून काम करणाऱ्या निनाद पाटीलनं सांगितलं. विवाह सोहळ्याच्या दिवशी आपण बेढब दिसू नये म्हणून फिटनेस कन्सल्टंटची मदत घेतली जाते. हे कन्सल्टंट वर-वधूंना 'फॅट लॉस एक्सरसाइज प्लॅन' (चरबी कमी करणं) तयार करून देतात. अनेकदा त्यासाठी दोघांनाही पॅकेज करून दिलं जातं. लग्नाच्या आधी साधारणपणे दीड ते दोन महिने आधीपासून ही तयारी सुरू होते. काही जागरुक मंडळी सहा महिने आधीपासूनही तयारीला लागतात. प्रत्येकाच्या आवश्यकतेनुसार त्यांना तसा प्लॅन करून दिला जातो. योग्य तो व्यायाम आणि न्यूट्रिशनच्या मदतीनं लग्नाच्या दोन दिवसांत तुम्ही सुडौल, आकर्षक कसं दिसाल याची पुरेपूर काळजी फिटनेसतज्ज्ञ घेतात. लग्नाआधीच्या महिनाभरात तुम्ही काय खावं, काय खाऊ नये याची रीतसर यादीच तयार करून दिली जाते. एकूण विवाहसोहळ्यांचा विचार करता, साधारण पस्तीस ते चाळीस टक्के तरुण-तरुणी 'पर्सनॅलिटी ग्रूमिंग' करून घेतात, असं तज्ज्ञ सांगतात. विवाह सोहळ्याच्या दिवशी टापटिप, सुंदर दिसण्याकडे तरुण-तरुणी अधिक लक्ष देऊ लागले आहेत. सर्वांना लग्नाच्या दिवशीचा आपला 'व्हिज्युअल अपिअरन्स' चांगला हवा असतो. त्यामुळे त्यासाठी फिटनेस कन्सल्टंटकडे येणाऱ्यांची संख्या वाढते आहे. व्यायाम आणि योग्य प्रकारे पोषण मिळावं यासाठी त्यांना त्यांच्या आवश्यकतेनुसार प्लॅन बनवून दिला जातो. एकूणच आपलं व्यक्तिमत्त्व प्रभावी, उठावदार दिसावं यासाठी वर-वधू प्रयत्नशील असतात. संकेत कुलकर्णी, फिटनेस कन्सल्टंट-स्पोर्ट्स न्यूट्रिशनिस्ट
मोबाइल अॅप डाउनलोड करा आणि राहा अपडेट