या साऱ्यात आपण नसलो तर, अशी वाटणारी भीती दूर करायची असेल, तर त्या साऱ्यात नसण्याचा आनंद लुटता यायला हवा. 'फोमो' आणि 'जोमो' या संकल्पना समजून घ्याव्यात आणि आपण कुठे असायला हवं, हे ठरवावं. पुणे टाइम्स टीम सध्याचा काळात 'मानसिक आरोग्याची' खूप चर्चा होताना दिसते. एका मध्यमवर्गाीय माणसाच्या डोक्यात साधारणपणे शिक्षण, काम, नाती व एकंदरीत आयुष्याबद्दलचे प्रश्न, या विषयांबाबत सतत विचार चालू असतात. विद्यार्थ्यांना गुणांचा व शैक्षणिक संधींचा, कमवणाऱ्या माणसाला कामाचा, घराच्या आर्थिक व्यवस्थेचा व त्याचबरोबर नात्यांचा सामतोल सांभाळण्याचा ताण खांद्यावर पेलायला लागतो. या जबाबदाऱ्या पार पाडताना आपण स्वतःकडे लक्ष द्यायलाच विसरून जातो. आपल्याला मित्रांबरोबर व परिवाराबरोबरच्या सगळ्या कार्यक्रमांमधे सामील होण्याची इच्छा असते. तसं घडलं नाही, की जाणवतो 'फोमो' म्हणजेच 'फिअर ॲाफ मिसिंग आउट'. ही भावना बहिर्मुख व्यक्तींसाठी जास्त त्रासदायक असते. याउलट असे बेत टाळण्यासाठी काही लोकांचा पुरेपूर खाटाटोप चालू असतो. तो वेळ ते स्वतःला देतात. त्यांना ज्या गोष्टींमधून आनंद मिळतो, ज्या गोष्टींमधून त्यांना मनःशांती मिळते, ते करण्यामधे ही मंडळी हा वेळ गुंतवतात. असा बेत टाळून मिळणारा आनंद म्हणजे 'जोमो' - 'जॉय ॲाफ मिसिंग आउट'. ही संकल्पना अंतर्मुख व्यक्तींमधे जास्त आढळते. असा विचार करा, की एका शुक्रवारी संध्याकाळी तुम्ही कामावरून थकून घरी आला आहात. पुढच्या दोन दिवसांचे मौजेचे बेत तुम्ही आधीच ठरवून ठेवले आहेत; पण पुढच्या दिवशी सकाळी जाणवतं, बाहेर कडाक्याची थंडी पडली आहे. घराबाहेर सोडा; पण पांघरूणाबाहेरही पडायची इच्छा होत नाही. अशा परिस्थतीत तुमच्यासमोर एकच पर्याय उरतो, तो म्हणजे ठरवलेले बेत रद्द करणं. त्या ऐवजी, तुम्ही उठून स्वतःसाठी गरमागरम चहा करता. पुढचा संपूर्ण दिवस तुम्ही पुस्तक वाचण्यात किंवा एखादी वेब-सीरीज 'बिंज वॉच' करण्यात घालवता. या सगळ्यातून मिळणारा आनंद म्हणजेच 'जोमो.' बेत रद्द करून नक्की करायचं काय? मित्रांबरोबर व परिवाराबरोबरचे काही बेत रद्द करून, तुम्ही तुम्हाला हवं ते करू शकता. काहीही न करण्याचा आनंदही लुटू शकता! एखादं अपूर्ण राहिलेलं पुस्तक वाचा. इंटरनेटच्या साहाय्याने एखादा नवीन पदार्थ बनवायला शिकवा किंवा एखादं वाद्य शिकायला सुरुवात करा. जे छंद पूर्ण आठवडाभर जोपासता येत नाहीत, ते या वेळेत जोपासा. एखादा चित्रपट बघायला किंवा आवडत्या हॉटेलमधे जा. स्वतःबरोबर वेळ घालवा, जेणे करून तुम्ही स्वतःलाच नव्या रूपानं भेटाल व खऱ्या अर्थानं स्वतःला ओळखू लागाल. 'जोमो'नं होणारे फायदे आयुष्यात सुखाचा व दुःखाचा समान वाटा असतो. तो सुखाचा वाटा आयुष्याच्या कुठल्या टप्प्यावर आपल्याला स्पर्श करतो, हे जाणून घेणं आपल्यावरच अवलंबून असतं. आनंद हा कोणालाच मिळत नसतो, तर त्याचा ध्यास घेऊन तो शोधावा लागतो. सेशल मीडियावर लोक सतत आपलं आयुष्य किती रोमांचक आहे, हे दाखविण्याचा प्रयत्न करतात. तो मजकूर बघून खरी परिस्थिती कशी जाणून घ्यायची, हे आपल्याला कळलं पाहिजे. 'जोमो'मुळे आपण समाधानी होतो. आपला आत्मविश्वास व स्वतःवरची आशा वाढायला लागते. सोशल मीडियाच्या ट्रेंड्स, लाइक्स, शेअर्स व चॅलेंजेसविना आयुष्य सोपं वाटायला लागतं. हा 'फोमो'पासून 'जोमो'पर्यंतचा प्रवास सर्वांनीच अनुभवायची गरज आजचा दिखाव्याचा जगात भासते.
मोबाइल अॅप डाउनलोड करा आणि राहा अपडेट