'जसा देश तसा वेश' अशी आपल्याकडे म्हण आहे. पण गेल्या काही वर्षांपासून हवामानानुसार, ऋतूनुसार कपड्यांच्या फॅशनमध्ये होणारा बदल अधिक ठळकपणे जाणवू लागला आहे. फॅशन जगतात होणारा बदल कपड्यांच्या ट्रेंडनुसार चटकन लक्षात येतो. ऋतू कोणताही असो आपण फॅशनेबल, ट्रेंडी दिसावं असं प्रत्येकाला वाटतं. म्हणूनच ऋतू, सिझन ज्याप्रमाणे बदलतो त्याप्रमाणे मार्केटमध्ये कपड्यांच्या फॅशनमध्ये बदल होताना दिसतात.
साधारण फेब्रुवारीनंतर उन्हाळ्याची चाहूल सुरू होते. पण यावर्षी हिवाळ्यात सकाळी थंडी, दुपारी उकाडा आणि संध्याकाळी पाऊस असं विचित्र वातावरण सगळ्यांनीच अनुभवलं. अशा वातावरणात नेमके काय कपडे घालावे, कोणती फॅशन करावी असे प्रश्न आपल्याला पडणं स्वाभाविकच आहे. यंदाच्या थंडीत 'हुडी' हा प्रकार मुलींच्या फॅशनमध्ये मोठ्या प्रमाणात बघायला मिळाला. हुडी वरून दिसायला जाड असली तरी ती मऊ असते. जीन्सवर टॉप म्हणूनही आपण त्याचा वापर करू शकतो, तसेच जॅकेट म्हणूनही ते वापरू शकतो. उन्हाळ्यातही हा प्रकार सुटसुटीत आहे. उन्हाळ्यात अगदी हलकं, सुटसुटीत काही तरी घालून बाहेर पडावं आणि शक्य तितकी या उकड्यापासून सुटका करून घ्यावी, असं प्रत्येकाला वाटत असतं. उन्हाळ्यात खासकरून त्वचा टॅन होऊ नये (काळी पडू नये) म्हणून पूर्ण आणि शक्यतो पांढरे कपडे घालण्याची फॅशन असते, जी सध्या हळू हळू दिसत आहे. काहीसे सुटसुटीत, सैल आणि शॉर्ट कपड्यांचाही सध्या ट्रेंड आहे.
फॅशन करण्यासाठी उन्हाळा हा खरंतर चांगला ऋतू आहे. उन्हाळ्यातही आपण वैशिष्ट्यपूर्ण पेहराव करू शकतो. उन्हाळ्यात वापरल्या जाणाऱ्या कापडाला म्हणजेच कपड्यांच्या प्रकारांना 'कूल फॅब्रिक' म्हणतात. उन्हाळ्यात टाईट जीन्स, लेगिंग्जपेक्षा पलाझो, स्कर्ट, क्रॉप टॉप, लूज कुर्ता, पजामा पॅन्ट, स्कार्फ, कॉटन वनपीस, डेनिम मिडी, जाळीदार जॅकेट, श्रग हे सुटसुटीत आणि फॅशनेबल कपडे आहेत. उन्हाळ्यात पलाझो हा एक उत्तम पर्याय आहे. ऑफिसमध्ये किंवा दिवसभर बाहेर असू, तर जीन्स किंवा लेगिंग्जमुळे घामाचा त्रास होतो. अशावेळी कॉटन, रेयॉन पलाझो वापरल्या तर सुटसुटीत पण फॅशनेबल लूक मिळतो. पलाझोवर लाँग सैल कुर्ता उठून दिसतो, तर एथनिक, वेस्टर्न लूकसाठी टी-शर्ट, क्रॉप टॉप, बेल स्लीव्हज टॉपही उठून दिसतात. पलाझोबरोबर पजामा पॅन्टचाही ट्रेंड आहे. पूर्वी उन्हाळा म्हंटल की शक्यतो पांढऱ्या रंगांचे कपडे घेण्याकडे कल असायचा. पण सध्या विविध फिकट रंगांच्या कपड्यांची चलती आहे. पलाझोबरोबर स्कर्ट हा प्रकारसुद्धा सुटसुटीत आहे. स्कर्ट हा प्रकार तसा जुनाच, पण फॅशनच्या रंगीबेरंगी दुनियेत सध्या डेनिम स्कर्ट, मध्यभागी कट असलेला, बटण असलेला, हायवेस्ट, एलाइन, शॉर्ट स्कर्ट अशा अनेक नवनवीन प्रकारांची चलती आहे.
सगळ्या ऋतूंमध्ये चालणारा एक प्रकार म्हणजे स्कार्फ. थंडीमध्ये या स्कार्फचा वापर थंडीपासून बचाव करण्यासाठी होतो तर उन्हाळ्यात केस आणि चेहरा झाकण्यासाठी करता येतो. स्कार्फमुळे कोणत्याही कपड्याला हटके लूक येतो. फॅशनेबल, वेस्टर्न, एथनिक, फ्युजन, लोकरीचे, फ्लोरल डिझाइन, चेक्स प्रिंट, कॉटन, फंकी डिझाइन असे अनेक स्कार्फ सध्या बाजारात उपलब्ध आहेत. स्कार्फचा वापर केसांचा पोनिटेल बांधण्यासाठी आपण करू शकतो. ही फॅशन ९० च्या दशकात हिंदी मराठी चित्रपटात होती. हा ट्रेंड सध्या पुन्हा बघायला मिळत आहे. यामुळे एक हटके लूक मिळतो. स्कार्फचा हा ट्रेंड मुलांमध्येही दिसत आहे. याशिवाय कॅप, हॅट यांची फॅशन सध्या मुलींमध्ये दिसत आहे.
हटके श्रग
उन्हाळ्यात पूर्वी सनकोटला मागणी असायची, पण हल्ली सनकोटऐवजी विविध जॅकेट्स, श्रग यांना अधिक मागणी आहे. डेनिम जॅकेट, कॉटन, रेयॉन श्रग, राजस्थानी जॅकेट असे अनेक प्रकार तरुणींचे लक्ष वेधून घेत आहेत. यात स्लीवलेस, फूल, रफल स्लीव्हज असे अनेक प्रकार आहेत. उन्हापासून बचाव करण्यासाठी मऊ, सुती कापडाचे फिकट रंगांचे श्रगचे विविध प्रकार सध्या बाजारात आहेत. यात प्लेन, फ्लोरल डिझाइन यांना अधिक मागणी आहे. ट्रॅडिशनल, वेस्टर्न कोणत्याही लूकसाठी हा एक उत्तम पर्याय आहे. हल्ली सनकोटऐवजी ट्रेंडी, फॅशनेबल श्रग, जॅकेट वापरण्याकडे मुलींचा अधिक कल आहे
मोबाइल अॅप डाउनलोड करा आणि राहा अपडेट