शिक्षणाची ओढ त्यांना स्वस्थ बसू देत नव्हती. कधी लग्नामुळे तर कधी इतर अडचणींमुळे अपुरी राहिलेली ही शिक्षणाची इच्छा त्यांनी जिद्दीने पूर्ण केलीच. सोबत नोकरी, संसारही सांभाळला. अशाच जिद्दी मैत्रिणींबद्दल...
पीएचडी मिळवलीच
एमफार्मपर्यंतच शिक्षण घेतल्यानंतर मला चांगली नोकरी लागली. मग लग्न झालं. पीएचडी करायची तळमळ होतीच पण नोकरीमध्ये चांगली प्रगती होत गेली. त्यामुळे ती सोडून पीएचडी करणं शक्य नव्हतं. नोकरी करता करता पीएचडी करणंही तितकंच कठीण होतं. कॉर्पोरेट जॉब, शाळेत जाणारी दोन लहान मुलं, एकत्र कुटुंब, पीएचडी या सगळ्याच गोष्टींकडे दुर्लक्ष करून चालणार नव्हतं. पण निर्धार केला आणि सगळं सांभाळून अभ्यास करायला सुरुवात केली. पीएचडीचा प्रबंध तर पहाटे २ ते ५ या वेळेत लिहिला. रोज संध्याकाळी अभ्यास करायचे. सुट्टी मिळाल्यावरही अभ्यासच केला आणि पीएचडी पूर्ण केली.
- डॉ. अश्विनी सांडू, ग्लोबल आयपीआर हेड
इच्छापूर्ती
मी पोदार कॉलेज मधून बीकॉमची पदवी घेतली. लग्नानंतर डोंबिवलीला रहायला आले. डोंबिवली ते सीएसटी असा दीड तासाचा प्रवास होताच आणि त्यामुळे या प्रवासात वाचनाची आवड जोपासता आली. मुलं, नोकरी यांची सांगड घालतच मराठीत मास्टर्स करायचं ठरवलं. सगळं सांभाळायचं असल्याने मी सुट्टीच्या दिवशी म्हणजे दर रविवारी कॉलेजला जायचे. लेक्चर्स, अभ्यास, प्रकल्प शिवाय नोकरी आणि घरातलं सगळं करून मास्टर्सची पदवी मिळाली. त्यामुळे उच्चशिक्षणाची इच्छा पूर्ण झाली.
- उज्वला डोके, महापालिका नोकरी.
मजा येते
पदवी घेतल्यानंतर मी पत्रकारितेचं शिक्षण घेतलं. रेडिओ, टीव्ही इथे फ्रीलान्सिंग करत होते. संसार सुरु झाल्यावर मात्र मला काही वेगळं करावंसं वाटलं. आता मी रचना संसद कॉलेजमधून फिल्म मेकिंगमध्ये डिप्लोमा करतेय. खरंतर घर आणि अभ्यास या दोन्ही गोष्टी सांभाळताना कसरत होते खरी पण मजाही येते. घरातल्या सर्वांनी साथ दिल्याने आणि माझी इच्छा प्रबळ असल्याने मी हे सर्व करू शकते.
रश्मी आमडेकर, फ्रीलान्सर
भाषेची गोडी
मी बीकॉम केल्यावर सीएस करत होते. शिवाय जर्मन भाषा शिकत होते. ही भाषा आवडीची होती मला करिअरही करायचं होतं. जर्मनचे सगळे कोर्सेस करायला सुरुवात केली. घर, दोन लहान मुली, अभ्यास हे सगळं सांभाळत कोर्सेस पूर्ण केले. काही मुंबईला होते तर काही पुण्याला. एक महिना तर मी जर्मनीला जाऊन राहिले होते. कोर्सेसच्या काळात सकाळी सहाला माझा दिवस सुरु व्हायचा. मग स्वयंपाक, मुलांचं आवरणं, त्यांना शाळेत पाठवणं हे सगळं केल्यानंतर मी माझ्याही अभ्यासाची आणि परीक्षेची तयारी करायचे. आता मी भाषांतर करतेच. सोबतच खासगी शिकवण्या आणि इतरही काही शाळा-कॉलेजांमध्ये जर्मन शिकवते.
गायत्री प्रभुदेसाई, जर्मन भाषांतरकार
जिद्दीने केलं एमबीए
बीकॉम झाल्यानंतर पुढे शिक्षणाची आवड होती. पण परिस्थितीमुळे ते शक्य झालं नाही. नोकरी करणंही भागच होतं. मग लग्नानंतर नोकरी चालू ठेऊनच शिक्षण घ्यायला सुरुवात केली. म एमबीए करत होते. सकाळी चारला माझा दिवस सुरु व्हायचा. घरचं सगळं सांभाळून, नोकरी करून अभ्यासाला बसेपर्यंत रात्रच होऊन जायची. त्यामुळे रात्री उशिरापर्यंत जागणं तर कायमचंच झालं होतं. अशारितीने जिद्दीने एमबीए पूर्ण केलंच.
- शीतल दांडेकर. एमबीए
आवडीची धावपळ
बीएनंतर लगेचच माझं लग्न झालं. पण मला लग्नानंतरही शिक्षण सुरुच ठेवायचं होतं. मी शाळेत नोकरी करते. आता मी चाइल्ड सायकॉलॉजीमध्ये डिप्लोमा आणि फिलॉसॉफीमध्ये मास्टर्स करतेय. अर्थात तिथला अभ्यास आणि घरातल्या छोट्यामोठ्या गोष्टी कधीकधी विसरायला होतात. मग खूप तारांबळ उडते. पण माझं आवडीचं क्षेत्र असल्याने कामाचा त्रास होत नाही. मी ती सगळी धावपळही आवडीने करते.
-रमा पटवर्धन, शिक्षिका
मोबाइल अॅप डाउनलोड करा आणि राहा अपडेट