आपली धावपळ, त्यातून येणारा ताण, मानसिक थकवा, आजारपण हे एक न संपणारं दुष्टचक्र आहे. पण हा ताण घालवण्यासाठी तुम्ही नेमकं काय करता? कोणते फंडे तुम्हाला या ताणापासून दूर नेतात? असं विचारल्यावर मुक्ताच्या वाचकमैत्रिणी अगदी भरभरून व्यक्त झाल्या.
ऑल इज वेल
नुकतीच माझी बारावीच्या परीक्षा संपली. एका मोठ्या ताणातून मी बाहेर आलेय. या वर्षात भरपूर अभ्यास होता, ताणही होता. पण त्यातून सहीसलामत सुटण्याचा मार्ग मला सापडला आहे. तो म्हणजे, सकारात्मक विचार. आपल्याला काही अडचण आली की आपण लगेचच 'बापरे आता माझं कसं होणार?' असा नकारात्मक विचार करतो. त्यामुळे इतर सुरळीत चाललेल्या गोष्टी सुद्धा बिघडवून बसतो. पण त्याऐवजी सगळं नीट होईल, ऑल इज वेल असं म्हटलं तर जास्त उत्तम ठरतं. सकारात्मक विचारांमुळे ताण कुठच्या कुठे पळून जातो.
फार चिंता वाटली किंवा ताण आला तर मी सरळ शांतपणे डोळे मिटते आणि माझी अडचण दूर झाली आहे, असं चित्र डो‍ळ्यासमोर आणते. त्यामुळे मला फार बरं वाटतं.
- मनाली काळे, डोंबिवली
छंद जोपासते
रोजची धावपळ आणि त्यातून येणारा ताण या दोन गोष्टी आपण टाळू शकत नाही. पण ताणाला स्वतःच्या मनावर स्वार होऊ न देण्यासाठी मी जाणीवपूर्वक काही प्रयत्न करते. स्वतःला मी मुद्दाम काही सवयी लावून घेतल्या आहेत. वक्तशीरपणा, वेळ पाळणं, कामाचा उरक आणि वेळच्या वेळी निर्णय घेतल्याने माझा ताण खूप कमी होतो. दुसरी महत्त्वाची गोष्ट म्हणजे मी आयुष्यात फार अपेक्षा ठेवत नाही. त्यामुळे अपेक्षाभंगाचा धोकाच उरत नाही. पुढे येणारा ताणही आधीच पळून जातो. याशिवाय निसर्ग भ्रमण, योगा, वाचन-लेखन असे आवडते छंद माझं मन ताजंतवानं करतात.
- प्रज्ञा महिंद्रकर, वाळकेश्वर
नाचो
माझ्यासाठी ताण घालवण्याचा रामबाण उपाय म्हणजे नृत्य. मला ताण आला की, मी कोणतंही गाणं लावते आणि स्वतःला बरं वाटेपर्यंत नाचते. असं केल्याने माझं टेन्शन कुठच्या कुठे पळून जातं. बाहेर असताना असं करणं कधीकधी शक्य होत नाही. त्यावेळेस मी मोबाइलवर मस्तपैकी शांत गाणी ऐकते. असं केल्यावर मनातलं विचारांचं मळभ निघून जातं. खूप मोकळं वाटतं. मनावरचा ताण निश्चितच हलका होतो. खूप बरं वाटतं. मला चॉकलेट आवडतात. त्यामुळे ताण घालवण्यासाठी मी त्याचाही उपयोग करते. ताण आल्यावर चक्क एकाजागी बसून आवडीचं चॉकलेट चवीचवीने खाते. मग चॉकलेटच्या प्रत्येक तुकड्यासरशी मनावरचा ताणही निघून जातो. ही खादाडी मला ताण घालवण्यासाठी फार मदत करते.
- जुई निखारगे, कळवा
आकडे मोजते
रोजच्या जीवनात जगतांना मनावर सतत टेन्शनची टांगती तलवार असते. म्हणून मी टेन्शन कमी करण्याच्या प्रयत्नात असते. मला टेन्शन आलं की मी मनात आकडे म्हणायला सुरूवात करते. ते आकडे म्हणताना चक्क बोटांवर मोजून म्हणते. हा उपाय जरा मजेशीर आहे पण खूप उपयोगी आहे. त्याचबरोबर नियमित योगा करणं हा सगळ्यात उत्तम उपाय. योगामुळे माझी मनस्थिती स्थिर राहते. कारण मला वाटतं की ताणाला, मेंदूपर्यंतच वाव द्यावा. तो मनापर्यंत गेला की मग त्याल तिथून हुसकावणं फार कठीण जातं. शिवाय विविध रोगांशी सामनाही करावा लागतो. त्यामुळे मी माझ्या ताणाला मनापर्यंत पोहोचूच देत नाही.
- शिल्पा साटम, ठाणे
दोस्त माझे मस्त
ताण असो किंवा आणखी कोणतीही अडचण. या सगळ्यावर एकच रामबाण उपाय आहे, तो म्हणजे मित्र-मैत्रिणी. खरे मित्र आपली कोणतीही अडचण दूर करतात. आजकाल तर सगळे एका क्लिकवर हजर असतात. त्यामुळे ताण आला की मी रडत किंवा कुढत बसत नाही. माझ्या जिवश्च-कंठश्च मित्रांशी तो लगेचच शेअर करते. कधी त्यांच्या अडचणी, त्यांचे ताणही ऐकून घेते. असं सुखदुःख वाटल्यामुळे ताण कधी निघून जातो ते कळतंच नाही
- शमा बुचडे, डोंबिवली
जादुई डायरी
मी शिक्षिका आहे. अनेक प्रकारचे व्याप आणि कामं मला असतात. अशावेळेस काम करतांना कोणताही ताण घेणं, हे घातकी ठरू शकतं. म्हणून मी जास्तीतजास्त प्रयत्न करते की मला ताण येणारच नाही. पण तरीही ताण येणं काही चुकत नाही, अशावेळी मी त्या अडचणीबद्दल शांतपणे विचार करते. माझ्याकडे आणखी एक रामबाण उपाय आहे. तो म्हणजे माझी कवितांची डायरी. या डायरीत मी आवडलेल्या कविता संग्रहित करून ठेवल्या आहेत. मला ताण आल्यावर मी ही डायरी वाचते. या कविता माझा ताण कुठच्या कुठे पळवतात. मला वाचनाची आवड आहे. त्यामुळे उत्तम पुस्तकं वाचूनही मी माझं डोकं शांत करते.
- गीता केतकर, डोंबिवली
संगीतानंद
ताण आल्यावर मन दुस-या कामात गुंतवणं हा योग्य पर्याय आहे. मला ताण आल्यावर मी आनंदी राहण्याचा प्रयत्न करते. वेगवेगळ्या प्रकारची गाणी ऐकते. त्यानेही काहीच झालं नाही तर मग वेगवेगळे खेळ खेळत बसते. टीव्ही लावून बसते. फारच ताण आला तर मात्र सरळ पांघरुणात गुरगुटून झोपून जाते.
-गायत्री करंदीकर, कल्याण
आनंदी राहा
जेव्हा जेव्हा ताण किंवा टेन्शनची गोष्ट येते, तेव्हा लोकं 'टेन्शन लेनेका नही देनेका' हे वाक्य ऐकवतात. त्यातली गंमत सोडून देऊ पण मला वाटतं ताण जसा घेऊ नये तसा देऊही नये. ताण कुणाला नसतो? रस्त्यावरच्या भिका‍‍ऱ्यापासून ते अब्जाधिशापर्यंत सगळ्यांना निरनिराळे ताण असतात. मला वाटतं, ताणाला खंबीरपणे सामोरं जाणं महत्त्वाचं. त्याचा अति बाऊ करू नये. आपला ताण दुस‍ऱ्याला सांगून त्याचाही ताण वाढवू नये. हाच खरा टेन्शन खल्लासचा फंडा आहे. नुकतंच व्हॉटसअॅपवर एक वाक्य वाचलं होतं. 'सब रोगों की एक दवाई, हसना सीखो मेरे भाई' त्यामुळेच हसत राहा. आनंदी माणसाच्या आसपास फिरकायची हिंमत ताणही करत नाही.
- माधवी जाधव, बदलापूर
आई-बाबांशी संवाद
लहानपणी कसे आपण प्रत्येक गोष्ट अडली की आईबाबांकडे जायचो, तसंच मी आत्ताही करते. मला कधीही ताण आला की मी आधी आई-बाबांशी बोलते. त्यांच्याशी भरपूर गप्पा मारल्या की माझा ताण कुठच्या कुठे पळून जातो. मला अगदी हलकं वाटतं. आई-बाबा घरात नसतील किंवा त्याना वेळ नसेल तर मी पुस्तकं वाचते. त्यात वेळ कसा जातो हे कळतच नाही.
-भूमिका नागावेकर
मोबाइल अॅप डाउनलोड करा आणि राहा अपडेट