लॅपटॉप लाइट - अंधारात किंवा कमी प्रकाशात लॅपटॉपवर काम करणारी बहिण असेल तर तिच्यासाठी हे अगदी छान गिफ्ट ठरेल. लॅपटॉपच्या युएसबी कॉड कनेक्शनमध्ये हा लाइट लावला की कमी प्रकाशात नीट काम करता येण्याइतपत याचा प्रकाश पडतो. पॉवर बँकमध्ये हा लाइट कनेक्ट केला तरी चालतो. हा लाइट रबरी असल्याने हवा तसा वाकवता, फिरवता येतो. शिवाय लाल, निळा, पिवळ्या या रंगांसोबतच निऑन नियॉन रंगातही हे लाइट उपलब्ध आहेत. अगदी ८५ रूपयापासून १२० रूपयांपर्यंत हे लाइट मिळतात.
मोबाईल पेनड्राइव्ह कनेक्टर - युएसबी कॉडसारखी असणारी ही कॉड गिफ्ट द्यायला उत्तम पर्याय आहे. या कॉडमुळे मोबाईलमधला डेटा थेट पेनड्राइव्हमध्ये ट्रान्स्फर करता येतो. दरवेळी लॅपटॉप बरोबर नेणं जमतंच असं नव्हे. अशावेळी ही भेट चांगली उपयोगी येते. ९५ ते १२० रूपयांपर्यंत ही कॉड मिळते.
स्टेशनरी - शाळेत जाणारी भावंडं असतील तर स्टेशनरीचा पर्याय छान आहे. हातावरचं घड्याळ, हातोडी, ट्रक, ट्रॅक्टर, मोबाईल अशा निरनिराळ्या आकारात फॅन्सी खोडरबर येतात. शार्पनर येतात. कंपासपेट्यांचे तर हजारो प्रकार असतात.
मॅग्नेटीक फोटो फ्रेम - एका चौकटीतली ही छोटी फोटोफ्रेम मॅग्नेटमुळे हवेत गोल फिरते. या फ्रेमच्या दोन्ही बाजूला फोटो लावता येतात. इलेक्ट्रीकवर चालणा-या या फ्रेममध्ये वेगवेगळ्या रंगाचे लाइट लावण्याची सोय आहे. ही फोटोफ्रेम ५५० रुपयांपासून ८५० रुपयांपर्यंत मिळते.
मेनिक्युअर कीट - हे कीट मार्केटमध्ये येऊन खूप दिवस झालेत. पण नटण्या-मुरडण्याची आवड असलेल्या बहिणाबाईसाठी हे छान गिफ्ट आहे. मेनिक्युअर पेडिक्युअरसाठी लागणा-या सगळ्या वस्तू या कीटमध्ये येतात. काही कीटमध्ये नखांना शेप द्यायला साचे, नेल आर्ट केलेली आर्टिफिशिअल नखंसुद्धा असतात. साधारण ८० रूपयांपासून ते ४५० रूपयांपर्यंत हे कीट मिळतं.
ट्रॅव्हलिंग कीट - भटकण्याची आवड असणारी बहिण असेल तर तिच्यासाठी एखादं झक्कास ट्रॅव्हलिंग कीट द्या. हे गिफ्ट भावालाही देता येऊ शकतं. यात साबण, टूथपेस्ट, तेलाची बाटली, प्रवासात वापरता येईल असं लहानसं नेलकट, शेव्हिंग कीट असं बरंच काही असतं. याची किंमत त्यातील वस्तूंनुसार ३५० ते ५०० रूपयांपर्यंत असते.
खाऊची भेट - तुमच्या भावाला किंवा बहिणीला खाऊची आवड असेल तर चॉकलेट आणि ड्रायफ्रूटचे अनेक प्रकार बाजारात आले आहेत. पण तुम्ही त्यात थोडं नाविन्यही आणू शकता. बॉक्सऐवजी सुटे पदार्थ घेऊन एखाद्या आकर्षक डब्यात आणि परडीत रॅप करून देऊ शकता.
मोबाइल अॅप डाउनलोड करा आणि राहा अपडेट