इच्छा आणि गरज यातला फरक
खरेदी करताना आपण बरेचदा गरजेपेक्षा अधिक प्राधान्य इच्छेला देतो. कधीकधी ते ठीक आहे. पण बरेचदा यामुळे आपल्याला गरजेच्या नसणा‍ऱ्या गोष्टी उदा. कपडे, भांडी, इलेक्ट्रोनिक्सची उपकरणं नकळत घेतली जातात. आपण आकर्षक ऑफर बघून भुलतो आणि त्या वस्तूची खरंच किती गरज आहे, हे विचार न करताच ती घेऊन टाकतो. हे टाळायला हवं. याउलट आपल्याला आवश्यक असलेल्या गोष्टींवरच्या ऑफर्स बघून त्याचा फायदा घेत योग्य ती शॉपिंग करायची संधी साधायला हवी. मित्राने किंवा नातेवाईकाने वस्तू घेतली की ती आपल्या घरी यायलाच हवी, असा अट्टहास बरा नव्हे. ती वस्तू खरंच उपयोगी असेल तर पैशांची गुंतवणूक करा.
यादी करा
खरेदी लहान असो वा मोठी. कधीही खरेदीला जाताना नेमक्या कोणत्या वस्तू आणायच्या याची एक यादी तयार करा. मॉल्समध्ये किंवा प्रदर्शनात किंवा ऑनलाइन साइटच्या सेलवर खूप वस्तू पाहिल्या की नको तेवढी खरेदी केली जाते. त्याला आळा घालण्यासाठी वस्तू आणि त्यांचं प्रमाण लिहून ठेवायला हवं.
बजेट ठरवा
एकदा यादी तयार झाली की लगेच बजेटही ठरवून टाका. कोणत्या प्रकारच्या वस्तू किती रुपयांत आणायच्या याचं नियोजन करा. त्याचा हिशोब लिहून खरेदीच्या वेळी हे आकडे विसरायला होणार नाही. आपल्या बजेटप्रमाणेच खर्च करा. वस्तू आवडली म्हणून बजेट सोडून महागड्या वस्तू खरेदी करू नका.
क्रेडीट कार्ड जपूनच वापरा
क्रेडीट कार्डाने खरेदी करताना आपण अगदी मोकाट सुटतो, म्हणालात तरी चुकीचं ठरणार नाही. आपल्यावर कुठलंच बंधन राहत नाही. मग अव्वाच्या सव्वा खरेदी तर होतेच शिवाय नंतर ते पैसे भरायला आपल्याकडे काही शिल्लकच उरलेली नसते. हा सगळा खटाटोप टाळण्यासाठी शक्यतो पैसे देऊन खरेदी करा. याशिवाय डेबिट कार्डवर खरेदी केली तर आपल्याच खात्यातले पैसे वापरले जात असल्याने त्याची नोंद पासबुकात राहते.
बिलं जपून ठेवा
खरेदी केल्यावर लगेचच बिलं टाकून देण्याची काहींची सवय असते. तुम्ही कार्डने पेमेंट केलं असेल तर एकवेळ, त्याचा ऑनलाइन ट्रॅक तरी राहतो पण रोख पैसे देऊन घेतलेल्या वस्तूंची बिलं जपून ठेवा. किमान त्याच्या वॉरंटी किंवा गॅरंटी काळापर्यंत ती जपणं आवश्यक आहे. एखादी वस्तू घरी जाऊन उघडून पाहिल्यानंतर जर त्यात काही दोष आढळला तर आपल्याकडे असलेलं हे बिल खूप कामी येतं.
संकलन - आकांक्षा मारुलकर
मोबाइल अॅप डाउनलोड करा आणि राहा अपडेट