प्रदूषण आणि शहरी रहदारीपासून दूर जात प्री वेडिंग ‘डेस्टिनेशन’ फोटोशूट करण्याचा ट्रेंड सध्या वाढतो आहे. यासाठी दगडी बांधकाम असलेलं जुनं मंदिर, टेकडी, तलाव, किल्ला, शेत किंवा समुद्रकिनारा यांसारखी ठिकाणं निवडली जात आहेत.
एकमेकांकडे त्यांचं अत्यंत प्रेमळ नजरेनं पाहाणं, तिनं त्याच्या हातात हात देऊन खांद्यावर डोकं टेकवत असतानाच त्यानं तिची हनुवटी हातानं वर करणं, त्याच्या हातातून आपला हात सोडवून घेण्याचा लटका प्रयत्न करत त्याच्याकडे पाठ करून तिचं पळून जाणं आणि इतक्यात त्यानं तिचा हात घट्ट धरून पुन्हा तिला मिठीत घेणं, हे सगळं कैद होतंय कॅमेऱ्यात. तेही त्याच दोघांच्या इच्छेवरून; कारण हे आहे प्री वेडिंग ‘डेस्टिनेशन’ फोटोशूट.
सध्या प्री वेडिंग ‘डेस्टिनेशन’ फोटोशूटचा ट्रेंड आहे. लग्नापूर्वी याहीआधी फोटोग्राफी व्हायचीच; पण ती वधू-वरांच्या आवडत्या लोकेशनवर जाऊन नाही, तर स्टुडिओमध्ये. आता मात्र समुद्रकिनारा, तलाव, टेकडी, जुनं दगडी बांधकाम असलेलं एखादं मंदिर, हिरवंगार शेत किंवा अगदी किल्ल्यावरसुद्धा हे प्री वेडिंग ‘डेस्टिनेशन’ फोटोशूट केलं जातं.
लग्नापूर्वी एकत्र घालवलेल्या सुंदर आणि रोमँटिक क्षणांची कायमची आठवण राहावी आणि लग्नाच्या तयारीदरम्यान गडबडीत असलेल्या वधू-वरांना एकमेकांना थोडा निवांत वेळ देता यावा, यासाठी हे फोटोशूट केलं जातं, असं वेडिंग फोटोग्राफर शैलेंद्र परदेशी सांगतो. सुरुवातीला लग्नापूर्वी एकमेकांना भेटूही दिलं जात नसे. आता तशी परिस्थिती राहिलेली नाही. काही वेळा ते दोघं वेगवेगळ्या शहरात नोकरी करणारे असतात, तर काही वेळा एकाच ठिकाणी राहत असूनही कामाच्या धांदलीत स्वतःच्याच लग्नासाठीसुद्धा वधू-वरांना वेगळा वेळ ‘काढावा’ लागत असल्याची उदाहरणं आजूबाजूला सहज दिसतात. त्यादरम्यान ‘प्री वेडिंग डेस्टिनेशन फोटोशूट’ म्हणजे या वधू-वरांसाठी एक सहलच ठरते. या शूटसाठी विशिष्ट कॉश्च्युम डिझाइन केला जातो. मेक-अप आर्टिस्ट ठरवला जातो. एखाद्या सिनेमाच्या थीमनुसार किंवा निवडलेल्या लोकेशननुसारही कॉश्च्युम आणि मेक-अप करून हे शूट केलं जातं.
आयुष्यात एकदाच होणारं आपलं लग्न अधिकाधिक खास व्हावं, याही उद्देशानं हे शूट केलं जात असल्याचं दीपाली शर्मा सांगते. संसाराच्या अवघड टप्प्यावर, नात्यातल्या एखाद्या कुरबुरीप्रसंगी किंवा विसंवादाच्या वेळी या क्षणांची सोबत नव्याने उभारी देत असल्याचंही तिचं मत आहे.
मोबाइल अॅप डाउनलोड करा आणि राहा अपडेट