काही दिवसांपूर्वी 'पोकेमोन गो', 'से अॅट मी' यांसारखे अनेक ट्रेंड्स अक्षरश: धुमाकूळ घालून गेले. त्याशिवाय अलीकडे यंगिस्तानमध्ये आणखीन एक ट्रेंड पाहायला मिळतोय तो म्हणजे स्पिनरचा.
काही दिवसांपूर्वी 'पोकेमोन गो', 'से अॅट मी' यांसारखे अनेक ट्रेंड्स अक्षरश: धुमाकूळ घालून गेले. त्याशिवाय अलीकडे यंगिस्तानमध्ये आणखीन एक ट्रेंड पाहायला मिळतोय तो म्हणजे स्पिनरचा. हे लहानसं खेळणं विविध किंमती आणि विविध रंगांत सहजपणे उपलब्ध आहे. अगदी कॉलेज कॅम्पसपासून ते लोकलची वाट बघत प्लॅटफॉर्मवर उभ्या असलेल्या गर्दीतसुद्धा आपल्या सगळ्यांना हे 'स्पिनरवेडे' नक्कीच दिसले असतील.
हल्ली एखादा ट्रेंड सोशल मीडियावर गाजू लागला तर सगळेजण अगदी डोळे मिटून तो ट्रेंड फॉलो करायला लागतात. त्याचंच उत्तम उदाहरण म्हणजे हे स्पिनर. काही तरुण तर केवळ सोशल मीडियावर स्पिनरचा फोटो टाकून 'लाइक्स' मिळविण्यासाठीच या स्पिनरचा जास्त वापर करत आहेत. या अनोख्या वेडापायी आपण या स्पिनरच्या तोट्यांकडे लक्षच देत नाही आहोत! या स्पिनरचे खरेतर खूप तोटे आहेत जसं की, लहान मुलांना या स्पिनरचं व्यसन जडलंय. काही मुलं तर हा स्पिनर वर्गात शिक्षक शिकवत असतानासुद्धा वापरताना दिसतात. ज्यामुळे पूर्ण वर्गाचं आणि शिकविणाऱ्या शिक्षकांचे ही लक्ष विचलित होऊ शकतं. त्याशिवाय त्यामध्ये बोट अडकून इजा होण्याचाही धोका असतो. हे झाले काही आघाडीचे दुष्परिणाम; पण यांसारखे अजूनही खूप दुष्परिणाम या स्पिनरचे आहेत. याच दुष्परिणामांमुळे काही शाळांनी स्पिनरवर बंदी घातली आहे.
थोडक्यात काय फ्रेंड्स, स्पिनर हे झालं फक्त एक उदाहरण, पण सोशल मीडियावरचा प्रत्येक ट्रेंड हा फक्त 'फायदेशीरच' असतो आणि तो फॉलो केलाच पाहिजे असं नाही. तर त्या ट्रेंडचे फायदे तोटे तपासून मगच तो फॉलो करण्याचा 'ट्रेंड' आपण सुरू केला तर ते नक्कीच फायदेशीर ठरेल!
मोबाइल अॅप डाउनलोड करा आणि राहा अपडेट