एक्कावन्न वेळा रक्तदान रक्तदानाचं महत्त्व माहीत असूनही केवळ गैरसमजुतींमुळे रक्तदान करण्याचं टाळणारेसुद्धा अनेकजण असतात. मात्र, सानपाडा इथे राहणारे महेश नरवडे यांचं उदाहरण आगळंवेगळं ठरावं. भारतीय लष्करातून निवृत्त झालेल्या महेश यांनी आतापर्यंत एकदा-दोनदा नव्हे तर तब्बल एक्कावन्न वेळा रक्तदान करून समाजापुढे वेगळा आदर्श ठेवला आहे. 'बी निगेटिव्ह' हा रक्तगट असणाऱ्या ३२ वर्षीय महेश यांना १९९९ साली झालेल्या कारगिल युद्धाच्यावेळी रक्तदान करण्याची प्रेरणा मिळाली . कॉलेजमध्ये एनसीसीला असताना त्यांनी पहिल्यांदा रक्तदान केलं होतं. त्यानंतर त्यांनी अजूनही रक्तदान करणं सुरू ठेवलं आहे. दर तीन महिन्यांनी नियमितपणे रक्तदान करणाऱ्या महेश यांनी मे महिन्यात सायन हॉस्पिटलमध्ये त्यांचं एक्कावन्नावं रक्तदान केलं. लष्करामध्ये कर्तव्य बजावत असताना आर्मी हॉस्पिटलमध्ये तर सुट्टीवर असताना सायन हॉस्पिटलमध्ये रक्तदान करत असल्याचं ते सांगतात. रक्तदानाच्या या समाजसेवेबद्दल महेश यांना महाराष्ट्र शासनाचं 'ग्रीन कार्ड' , तसेच ठाण्यातील रक्तानंद ग्रुपतर्फे 'रक्तकर्ण' पुरस्कार मिळाला आहे. 'परिवर्तन' घडवलं योग्य त्या रक्तगटाचं रक्त उपलब्ध न झाल्यामुळे काही वेळा रुग्णांवर प्राण गमावण्याची वेळ येते. यावर उपाय म्हणून 'टीम परिवर्तन'नं एक कल्पना लढवली. रक्तगटानुसार वेगवेगळे व्हॉट्सऍप ग्रुप बनवले. जेणेकरून त्या रक्ताची गरज कुठे, कधी आहे याबद्दलची माहिती त्या रक्तदात्यांपर्यंत लवकर पोहोचू शकेल. आणि त्यानुसार रक्तदान करता येईल. सोशल मीडियाचा वापर सोशल वर्कसाठी कशाप्रकारे करता येऊ शकतो याचं हे उत्तम उदाहरण म्हणता येईल. 'टीम परिवर्तन' हा एक तरुणांचा ग्रुप असून समाजात परिवर्तन घडवून कसं आणता येईल या दृष्टीनं त्यांचं काम सुरू असतं. रक्ताची गरज कुठे आहे त्यानुसार देखील तिथे पोहोचणं सोयीस्कर व्हावं म्हणून विभागांनुसार कल्याण, ठाणे, मुंबई असे वेगवेगळे ग्रुप करण्यात आले आहेत. सर्व ग्रुप्समध्ये जवळपास वीस रक्तदाते सहभागी आहेत. जवळपासच्या ब्लड बँक्सकडे देखील ते तातडीच्या वेळी संपर्क साधतात. 'गरजेच्या वेळी लोकांना मदत व्हावी, या उद्देशातून आम्ही ही कल्पना अमलात आणली', असं अविनाश पाटील यानं सांगितलं.
मोबाइल अॅप डाउनलोड करा आणि राहा अपडेट