आजच्या स्पर्धात्मक युगात आपल्यातील कौशल्य इतरांना शिकवत सामाजिक जाणीव जपणारी मंडळी बोटांवर मोजण्याइतकीच असतील. यापैकी एक म्हणजे सागर खरटमल. हलाखीच्या परिस्थितीतून वर येत त्यानं कराटेचं प्रशिक्षण घेतलं. त्याच्या संघर्षदायी प्रवासाविषयी जाणून घेऊ या... ०००० सूरज खरटमल, कॉलेज क्लब रिपोर्टर वयाच्या १२व्या वर्षापासून सागर खरटमलनं कराटेचं प्रशिक्षण घ्यायला सुरुवात केली. तेव्हाच सागरने कराटेच्या क्षेत्रात आपलं करिअर करायचं, असं ठरवलं होतं. पण घरची परिस्थिती बिकट असल्यामुळे त्याला कराटेचा क्लास सोडावा लागला. त्यानंतर काही वर्षांनी पुन्हा त्यानं स्वखर्चाने कराटे शिकण्यास सुरुवात केली. आपल्या नावापुढे मास्टर लागावं म्हणून सागरनं दिवस रात्र मेहनत घेतली. व्हाइट बेल्टपासून ब्लॅक बेल्टपर्यंतच्या प्रवासात त्यानं आंतरराष्टीय, राष्ट्रीय, राज्य आणि जिल्हास्तरीय कराटेच्या स्पर्धांमधून अनेक पारितोषिकं प्राप्त केलेली आहेत. २०१७ सालच्या वर्ल्ड फुनाकोशी शोतोकान कराटे ऑर्गनायझेशन आयोजित २२व्या आंतरराष्ट्रीय कराटे स्पर्धेत सागरनं सुवर्णपदक पटकावलं होतं. तसंच २०१८ साली सागरने त्याचे गुरु ग्रँड मास्टर बाळू शिंदे याच्या मार्गदर्शनाखाली युनायटेड शोतोकान कराटे अकादमीमधून ब्लॅक बेल्ट थर्ड डॅन डिग्री प्राप्त केली. तेव्हापासून सागरला मास्टर सागर म्हणून ओळखलं जाऊ लागलं. हे यश स्वत:च्या बळावर मिळवल्याचं सागर अभिमानानं सांगतो. आपल्याकडे कराटे क्लासेसची फी खूप जास्त आहे, त्यामुळे गरीब कुटुंबातील मुलामुलींना कमीतकमी पैसे खर्च करुन कराटेचं प्रशिक्षण मिळावं, या जाणिवेनं पदवी प्राप्त झाल्यानंतर सागरनं धारावीत कराटे क्लास सुरु केले. युनायटेड शोतोकान कराटे अकादमी या नावानं कराटे क्लासची पहिली शाखा सुरु केली. ही कराटे अकादमी वर्ल्ड फुनाकोशी शोतोकान कराटे संस्थेशी संलग्न आहे. मास्टर सागर कमीतकमी फी घेऊन मुलामुलींना कराटेचं प्रशिक्षण देतो. एवढंच नाही तर ज्या मुलांना फी देणं शक्य नाही त्या मुलांना मोफत कराटेचं प्रशिक्षण देतो. तसंच प्रत्यक्ष अनुभव मिळावा म्हणून कराटेच्या विविध स्पर्धांमध्ये मुलांना सहभाग घेण्यास सांगतो. त्याशिवाय मुलांचं कौतुक व्हावं, मुलांना अजून प्रोत्साहन मिळावं म्हणून दरवर्षी २६ जानेवारीला स्वखर्चानं कौतुक सोहळ्याचं आयोजन करतो. त्यामार्फत समाजामध्ये कराटे विषयी जागरूकता निर्माण करतो. स्त्रियांवर होणाऱ्या अत्याचाराचं प्रमाण वाढलेलं आहे, त्यामुळे स्त्रियांनी स्वसंरक्षणाचे धडे गिरवणं ही काळाची गरज आहे. यासाठी सागर विविध ठिकाणी जाऊन महिलांना स्वसंरक्षणाचे धडे देतो. विशेष म्हणजे हे संपूर्ण कार्य त्यानं कॉलेजचं शिक्षण घेत केलं आहे. आता धारावीत सागरच्या अकादमीच्या दोन शाखा आहेत. कराटे विषयी अजून जागरूकता निर्माण व्हावी आणि कमीतकमी शुल्कामध्ये गरजू मुलांना कराटेचं प्रशिक्षण उपलब्ध व्हावं म्हणून सागर प्रयत्न करत आहे. त्याशिवाय तो ग्रँड मास्टर पदवीची तयारी करतोय. ०००० समाजातील गरजू मुलांसाठी काही तरी करायचं, असं मी सुरुवातीपासूनच ठरवलं होतं. त्यामुळे मी कमीतकमी शुल्कामध्ये गरीब मुलांना कराटेचं प्रशिक्षण देतो. तसंच या मुलांना आंतरराष्ट्रीय पातळीपर्यंत पोहोचवण्यासाठी मी प्रयत्नशील आहे. सागर खरटमल
मोबाइल अॅप डाउनलोड करा आणि राहा अपडेट