गेलं संपूर्ण वर्ष हे महिलाप्रधान वेब सीरिजनी गाजवलं. त्यातली एकापेक्षा एक महिला व्यक्तिरेखा लक्षात राहिल्या. रविवारी असणाऱ्या ‘जागतिक महिला दिना’निमित्त ‘मुंटा’नं वेब दुनियेतल्या ‘ती’च्या बोलबाल्यावर टाकलेली एक नजर.
‘मेड इन हेवन’, ‘फोर मोअर शॉट्स प्लीज’, ‘लैला’, ‘क्वीन’, ‘आऊट ऑफ लव्ह’, ‘लाखों में एक’, ‘मॉम’...या वेब सीरिजमधून अनेक महिला व्यक्तिरेखा पाहायला मिळाल्या. या व्यक्तिरेखांमधून आजच्या आधुनिक जगातल्या महिलांचं विश्व समोर येतंय. या पात्रांच्या विविध छटांचं प्रेक्षकांकडून कौतुक होतंय.
जुन्या आणि आधुनिक विचारांच्या कचाट्यात सापडलेल्या ‘मेड इन हेवन’मधल्या तारामध्ये आजच्या स्त्रिया स्वत:ची छबी पाहतात. ‘फोर मोअर शॉट्स प्लीज’मधल्या चारही पात्रांच्या व्यथा वेगवेगळ्या असल्या, तरी त्यामध्ये आजच्या विचाराचं प्रतिबिंब दिसतं. ‘लैला’, ‘लाखों में एक’ आणि ‘मॉम’ यामधल्या पात्रांच्या छटा वेगळ्या होत्या. ‘आऊट ऑफ लव्ह’मधलं मीरा हे पात्र सुरुवातीला सोज्वळ वाटत असतानाच त्या पात्राची खलनायकी बाजू प्रेक्षकांना पाहायला मिळाली.
पात्रं हिट
महिलाकेंद्रित सीरिजशिवाय इतर सीरिजमधल्या अनेक महिला व्यक्तिरेखाही गाजल्या. ‘देल्ही क्राइम’मधील शैफाली शहा (वर्तिका चुर्तुवेदी) आणि रसिका दुग्गल (नीती सिंग), 'लिटील थिंग्स ३'मधली मिथिला पालकर (काव्या कुलकर्णी), 'सेक्रेड गेम्स २'मधील अमृता सुभाष (कुसुम देवी यादव), सुरविन चावला (जोजो) आणि कल्की कोएचिलीन (बात्या), 'सिटी ऑफ ड्रीम्स'मधील प्रिया बापट (पूर्णिमा) या पात्रांची चर्चा झाली. याशिवाय ‘माइंड द मल्होत्राज’मधील मिनी माथुर (शैफाली), 'व्हॉट द फोक्स ३'मधील रेणुका शहाणे (वंदू) आणि इशा चोप्रा (अनिता), ‘फरगॉटन आर्मी’मधील शर्वरी वाघ (माया), 'हॉस्टेजेस'मधील तिस्का चोप्रा (डॉ. मीरा आनंद) या पात्रांच्या छटा प्रेक्षकांना भावल्या. 'ताज महल १९८९'मध्ये गीतांजली कुलकर्णीनं साकारलेलं पात्र भाव खाऊन गेलं.
पडद्यामागेही महिला राज
फक्त पडद्यावरच नव्हे, वेब सीरिजच्या विविध अंगांमध्येही महिलांचा ठळक सहभाग पाहायला मिळतो. निर्मिती, दिग्दर्शन, कथानक आणि संवाद लेखन अशा विविध क्षेत्रांत महिलांची नावं दिसताहेत. यात झोया अख्तर आणि एकता कपूर यासारख्या मोठ्या नावांचा समावेश होतो.
मराठीला पसंती
मराठी सीरिजमध्ये 'हुतात्मा'मधली अंजली पाटील, 'काळे धंदे'मधली संस्कृती बालगुडे, 'आणि काय हवं'मधली प्रिया बापट, 'वन्स अ इयर'मधली मृण्मयी गोडबोले ही पात्रं प्रेक्षकांना आवडली.
कारणं काय?
० महिलांच्या भावविश्वाभोवती फिरणारं कथानक
० प्रेक्षकांची बदललेली मानसिकता
० वेगळं कथानक, पात्रं
० सेन्सॉरची नसलेली बंधनं
० आधुनिक विचारसरणीचं प्रतिबिंब
आगामी काय?
करिष्मा कपूरच्या ‘मेंटलहूड’ सीरिजची सध्या जोरदार चर्चा आहे. या सीरिजच्या ट्रेलरला उत्तम प्रतिसाद मिळाला आहे. 'द फॅमिली मॅन'च्या दुसऱ्या सीझनमध्ये अभिनेत्री समंथा दिसणार आहे. तिच्याही पात्राची जबरदस्त चर्चा आहे.
भूमिकांमध्ये पाहायला मिळणारी विविधता प्रेक्षकांच्या पसंतीस उतरतेय. टीव्हीचा बराचसा महिला प्रेक्षकवर्ग आता वेब सीरिजकडे वळू लागलाय. भूमिकांमध्ये अनेक प्रकारच्या छटा दिसायत. येत्या काळात याचं प्रमाण वाढणार आहे.
रेणुका शहाणे, अभिनेत्री
आपल्या आजूबाजूच्या महिला जशा असतात, तशी पात्रं या सीरिजमध्ये असतात. त्यामुळे जास्तीतजास्त महिलांना ही पात्रं आपलीशी वाटतात. उगाचच सोज्वळपणाचा मुलामा न देता, आहेत तशी ही पात्रं साकारली जातात.
अमोल उद्गीरकर, वेब सीरिज अभ्यासक
मोबाइल अॅप डाउनलोड करा आणि राहा अपडेट