मुंबई टाइम्स टीम सध्या लॉकडाऊनमुळे घरातून बाहेर पडता येत नाहीय. अशा वेळी रोज चटपटीत आणि झटपट तयार होणारे नवनवीन पदार्थ शोधून काढताना अनेक गृहिणींच्या नाकीनऊ येतायत. तसंच त्यांच्यासमोर उरलेल्या अन्नाचं काय करायचं हा प्रश्न आ वासून उभा ठाकला आहे. पण, जर उरलेल्या अन्नापासून काही वेगळे पटकन होणारे आणि चटपटीत पदार्थ करता आले तर? उरलेल्या पदार्थापासून बनवता येणारे लज्जतदार पदार्थ खास तुमच्यासाठी... चविष्ट राइस पॉपर्स जर तुमच्याकडे भात उरला असेल आणि काही चमचमीत खायची इच्छा झाली होत असेल तर चविष्ट राइस पॉपर्स नक्की बनवून बघा. यासाठी उरलेल्या भातामध्ये थोडेसे उकडलेले बटाटे, चिरलेला कांदा, थोडीशी कोथिंबीर घालून सर्व एकत्र करून घ्या. हे मिश्रण एकजीव होण्यासाठी तुम्हाला आवडत असलेलं पीठ घालून मिश्रण एकजीव करा. त्यानंतर त्या मिश्रणात चवीनुसार मीठ आणि मिरी पावडर घालून तयार मिश्रणाचे लहान-लहान गोळो करून घ्या. तुम्ही ते तळू किंवा बेक करू शकता. जर तुम्ही खवय्ये असाल तर खास हे चविष्ट पॉपर्स करण्यासाठी भात थोडा जास्त केलात तरी काही हरकत नाही! पोळीचे चिप्स उरलेल्या पोळ्यांचा वापर तुम्ही चविष्ट पोळीचे चिप्स बनवण्यासाठी करू शकता. कुरकुरीत आणि चटकदार पोळीचे चिप्स खायला दिल्यावर लहान मुलं तर हमखास खुश होतील. पोळीचे चिप्स बनविण्यासाठी त्याचे चौकोनी तुकडे करून त्यावर थोडंसं तेल लावून घ्या. नंतर त्या तुकड्यांवर थोडासा चाट मसाला आणि मीठ घालून साधारणपणे तीन मिनिटांसाठी हे पोळीचे तुकडे बेक करून घ्या आणि सर्व्ह करा. हे पोळीचे चिप्स तुम्ही एखाद्या डीपसोबत देखील सर्व्ह करू शकता. सॉस, चटणी, चीज किंवा क्रिमचे पर्याय तुमच्याकडे आहेत. उरलेल्या फळांची स्मूदी पौष्टिक पर्याय म्हणून फळं केव्हाही बेस्ट असतात. नुसती फळं खायची नसतील तर त्यापासून विविध पदार्थ बनवू शकतो. काही जण जास्त प्रमाणात फळं विकत आणून त्याचा गर काढून फ्रिजमध्ये ठेवतात. मग या फळांच्या चवदार आणि झटपट होणाऱ्या स्मूदीज बनवता येऊ शकतात. तुमच्याकडे जर फळं उपलब्ध असतील तर तुम्हीसुद्धा फक्त फळांच्या फोडी न खाता त्यांच्या स्मूदीज बनवून फळांना एक वेगळा टच देऊ शकता.
मोबाइल अॅप डाउनलोड करा आणि राहा अपडेट