बाइकच्या धडाडणाऱ्या इंजिनाचा आवाज आल्यास, जवळून निश्चितच मुलांचा ताफा चाललाय, अशी आपली समजूत व्हायची, इतके 'बाइकिंग'चे हे क्षेत्र मुलांनी व्यापले होते. मुलींच्या गाड्या म्हणजे नॉन-गिअर मोपेड, त्याही गुलाबी, लाल, अशा फेमिनाइन रंगाच्याच होत्या. बुलेट, हार्ले डेव्हिडसन, सुपरबाइक्स तसेच स्पोर्टस् बाइक्सवर इतकी वर्षे मुलींची मागच्या सीटवर असलेली जागा पुढच्या सीटवर आणण्याचे काम 'बाइकर्णी' या ग्रुपने केले आहे. या ग्रुपच्या सदस्य नुसत्याच सरळ डांबरी रस्त्यांवरून गाड्या चालवित नाहीत, तर बाइकिंगसाठी अवघड समजल्या जाणाऱ्या अतिउंचावरील एक्स्पेडिशन्सही त्यांनी यशस्वी पार पाडल्या आहेत.महिला बाइकर्ससाठीचा हा भारतातील पहिलाच ग्रुप आहे. उर्वशी पाटोळे, फिरदौस शेख, वर्तिका पांडे, दीपा मलिक, मुग्धा चौधरी या महिला बाइकर्सनी एकत्र येऊन १५ जानेवारी २०११मध्ये स्थापन केलेला हा ग्रुप आता भारतभर विस्तारला आहे. मुंबई-पुण्यासह दिल्ली, लखनौ, चेन्नई, बेंगळुरू, हैदराबाद, राजकोट, गुजरातची काही शहरे, म्हैसूर यासारख्या शहरांमध्येही 'बाइकर्णी' पोहोचली असून, वेगवेगळे उपक्रम त्यांच्याकडून राबवले जातात.अनेक मुलींना थोडीफार बाइक चालवता येते, मात्र लोक काय म्हणतील किंवा घरच्यांकडून परवानगी मिळणार नाही, या कारणांमुळे अजूनही मुली बाइक चालवण्यास बिचकतात. अशा मुलींना बाइक चालवण्यास प्रोत्साहन देणे, हा ग्रुपच्या स्थापनेमागील हेतू असल्याचे संस्थापक सदस्य वर्तिका पांडे यांनी सांगितले. 'लडाख मोहीम फत्ते झाल्यावर भारतभरातून आम्हाला संपर्क साधला गेला. अनेक मुली, महिला आमच्या ग्रुपशी जोडल्या गेल्या. फक्त पुण्यापुरताच मर्यादीत असलेला आमचा ग्रुप भारतभर वाढला,' असे त्या सांगतात.चार वर्षांत प्रगतीज्या हेतूने ग्रुपची स्थापना केली गेली, तो चार वर्षांत पूर्ण झाल्याचे पांडे यांनी समाधानपूर्वक सांगितले. आता बाइक चालवणाऱ्या मुलींची संख्या लक्षणीय वाढली आहे. ग्रुपमुळे आम्हाला ओळख मिळाली, मदत मिळाली आणि सर्वांत महत्त्वाचे म्हणजे मुलीही बाइक चालवू शकतात, तेही पुरुषांपेक्षा भन्नाट, हे सगळ्यांनाच पटले, असेही त्या आवर्जून सांगतात.काय-काय मिळवले?बाइक चालवता येण्यासारखा सर्वाधिक उंचीवरील रस्ता म्हणून लडाख मोहिमेतील 'खारदुंग ला' ही खिंड ओळखली जाते. ही मोहीम पूर्ण करणारा महिलांचा सर्वांत मोठा ग्रुप म्हणून लिम्का बुक ऑफ रेकॉर्ड़्समध्ये सन २०१३मध्ये 'बाइकर्णी'ची नोंद झाली आहे. 'इंटरनॅशनल वुमन बाइकर्स असोसिएशन'कडे नोंदणी झालेला हा पहिलाच ग्रुप आहे. ग्रुपच्या सदस्यांनी काही वैयक्तिक विक्रमही केले आहेत. वर्तिका पांडे यांनी १२ दिवसांत सुवर्णचौकोन म्हणजेच सात हजार किलोमीटर अंतर पार करण्याचा विक्रम केला आहे. हा विक्रम त्यांनी अपाचे १८० आरटीआर या गाडीवर केला. शलाका या बाइकर्णीनेही २४ तासांत पुणे-बेंगळुरू-पुणे असा १६०० किमीचा प्रवास एकदा नव्हे, दोनदा पूर्ण केला आहे. एकदा इम्पल्स बाइकवर सिंगल सीट, तर दुसऱ्यांदा रॉयल एनफिल्ड क्लासिक ३५० वर डबलसीट त्यांनी हा विक्रम केला आहे.जगातील सर्वाधिक उंचीवरील 'मोटोरेबल पास' अशी ओळख असणारी 'मार्समिक ला' गाठणारी शीतल बिडये ही पहिली महिला सोलो बाइकर ठरली. तिच्या या कामगिरीची नोंदही लिम्का बुक ऑफ रेकॉर्डसमध्ये झाली आहे.
मोबाइल अॅप डाउनलोड करा आणि राहा अपडेट