लग्नाच्या खरेदीइतकाच वेळ आणि पैसा आजकाल हनिमूनसाठीच्या शॉपिंगसाठी खर्च केला जातोय. आयुष्यात एकदाच येणारा हा काळ अविस्मरणीय बनवण्यासाठी आजची तरुणाई कोणतीही कसर ठेवत नाही.
लग्न महिन्यावर आलं असताना स्वाती आणि अक्षयनं आपापल्या ऑफिसमधून दोन दिवसांची सुट्टी घेतली आणि दोघंही मस्तपैकी शॉपिंगला निघाले... लग्नाच्या नव्हे, तर हनिमूनच्या; कारण आयुष्यात एकदाच येणारा हा हनिमूनचा काळ त्यांना 'परफेक्ट' बनवायचा होता. स्वाती आणि अक्षयप्रमाणेच इतर हौशी जोडपी भरपूर पैसे आणि मोठी सुट्टी खर्च करून हनिमूनला गेल्यानंतर एरवीपेक्षा वेगळं आयुष्य जगण्यासाठी अंतर्वस्त्रापासून चपलांपर्यंत खास शॉपिंग करताहेत.
रूटिनमध्ये, ऑफिसला किंवा भावी पार्टनरला भेटण्यासाठी जाताना जे कपडे, अॅक्सेसरीज वापरले जातात, तेच हनिमूनसाठी कशाला वापरायचे या भावनेतून आणि नेहमीपेक्षा पूर्णपणे वेगळा लूक, फील घेण्यासाठी ही खास खरेदी केली जाते. यात अर्थातच मुली आघाडीवर आहेत. कित्येकदा हनिमूनची ही खास खरेदीनंतर शहरातल्या दैनंदिन रूटिनमध्ये फारशी वापरली जात नाही. मात्र, परत वापरले जाणार नाहीत, अशा कपड्यांवर पैसे कशाला खर्च करायचे हा विचार आजची पिढी करत नाही. उलट आहे तो क्षण पुरेपूर एंजॉय करण्यासाठी आणि खास बनवण्यासाठी खर्च केला, तर काय बिघडलं असा त्यांचा विचार असतो.
कपड्यांची निवड
हनिमूनसाठी जाताना एरवीच्या चुडीदारला सुट्टी दिली जातेच; शिवाय जीन्स फक्त प्रवासापुरती ठेवून एरवीसाठी हॉट पँट्स, केप्रीज, स्कर्ट, वन पीस, फ्रॉक अशा कपड्यांची खरेदी केली जाते. टॉप्समध्येही ट्यूब टॉप, क्रॉप टॉप, हॉल्टर नेक, पार्टीवेअर घेतले जातात. डेस्टिनेशननुसार कपडे आणि रंगांची निवड केली जाते, हे त्याहून विशेष. बीच डेस्टिनेशन असेल, तर उठावदार, फ्लोरोसंट रंग घेतले जातात आणि हिल स्टेशन असेल, तर नेव्ही ब्ल्यू, ब्राउन, लाल अशा गडद रंगांना पसंती दिली जाते.
खरेदी अॅक्सेसरींची
अॅक्सेसरींमध्ये अँकलेट्स, टॅटू, एखादं ऑक्सडाइजचं कडं मुली खरेदी करतात. त्याशिवाय गॉगल, हनिमूनच्या कपड्यांवर शोभेल अशी स्लिंग बॅग किंवा टोटे बॅग, हाय हील्स, पेन्सिल हिल्स, प्लॅटफॉर्म्स, बीच डेस्टिनेशन असेल, तर फ्लिप- फ्लॉप्स घेतले जातात. हिलस्टेशन असेल, तर मफलर्स, शाल, स्टोल, स्वेटर्स, जर्किन यातली वैविध्यपूर्ण खरेदी केली जाते.
आमचा प्रेमविवाह. आम्ही लहान असल्यापासून एकमेकांना ओळखत आहोत. त्यामुळे हनिमूनला गेल्यानंतर मला नेहमीच्याच लूकमध्ये वावरायचं नव्हतं. नेहमीपेक्षा वेगळे कपडे, अॅक्सेसरी यामुळे लूक बदलून नवऱ्याला आश्चर्याचा धक्का द्यायचा होता. म्हणून मी हनिमूनसाठी पूर्णपणे वेगळी शॉपिंग केलं.
- मानसी शहा
हनिमूनसाठी गेल्यानंतर ऑफिसच्या सहलीला गेल्यासारखं दिसावं अशी माझी इच्छा नव्हती. म्हणून मी हनिमूनसाठी पूर्ण वेगळं शॉपिंग केलं. ट्रेंडी, सुटसुटीत, एरवी नेहमी आणि घरच्यांसमोर न घालता येणारे कपडे, अॅक्सेसरी घालून मजा करायची होती. त्यासाठी बरेच पैसे खर्च झाले, तरी ते चालणार होतं.
- प्राजक्ता जोशी
मोबाइल अॅप डाउनलोड करा आणि राहा अपडेट