महागड्या पावडरमध्ये कपडे भिजवले, की ते स्वच्छ होतात. अशा गैरसमजात राहू नका. कपडे जर नीट सांभाळून ठेवायचे असतील तर त्याची विशेष काळजी घ्यावी लागते.
प्रत्येकालाच कपडे आपल्याला शोभून दिसणारे असावेत असं वाटतं. याचबरोबर ते दीर्घकाळ टिकावेत तसंच स्वच्छ राहावेत अशी सर्वांचीच इच्छा असते; पण अनेकदा या कपड्यांची काळजी कशी घ्यावी हेच माहीत नसल्यामुळे कपडे लवकर खराब होतात. म्हणूनच दीर्घकाळ कपडे टिकावेत म्हणून कपड्यांची काळजी घेण्याच्या काही टिप्स देत आहोत. आता तुम्ही म्हणाल, की नियमित घालायच्या कपड्यांची कसली आलीए विशेष काळजी? मात्र, हीच काळजी व्यवस्थित घेतली जात नाही. महागड्या पावडरमध्ये कपडे भिजवून किंवा वॉशिंग मशीनला लावून ते धुतले जातात. यापलीकडेही कपड्यांची काळजी घेणं आवश्यक आहे.
ड्रेससाठी कापड घेतल्यानंतर शिवायला देताना ते धुवून आणि इस्त्री करून मगच द्यावं. जरीच्या साड्यांमध्ये डांबरगोळ्या ठेवताना त्या एखाद्या कापडात बांधून ठेवाव्यात. त्यामुळे साडी खराब होत नाही आणि त्यावर गोळ्यांचे डागही पडत नाहीत. इलॅस्टिक असलेले कपडे गरम पाण्यामध्ये बुडवू नयेत, त्यांचे इलॅस्टिक खराब होतं. सुती कपड्यांना इस्त्री करताना उलट बाजूनं करावी. त्यामुळे कड्याचा रंग टिकून राहतो. भरतकाम केलेल्या कपड्याला इस्त्री करताना त्यावर पातळ कापड अंथरावं. सिल्कच्या कपड्यांना इस्त्री करताना त्यावर पेपर टाकावा. पांढरे कपडे धुवून झाल्यानंतर शेवटी बादलीमध्ये थोडे पाणी घ्यावं, त्यात अर्धा लिंबू पिळावा आणि त्यामधून ते पांढरे कपडे एकदा बुडवून काढावेत. यामुळे पांढरे कपडे चमकदार दिसतात. पांढरे कपडे अधून-मधून सोडा घातलेल्या गरम पाण्यामध्ये भिजत ठेवावेत ते स्वच्छ होतात. लहान मुलांचे कपडे फार मळले असतील, तर पाणी, साबण आणि सोडा यांच्यासह कुकरमध्ये घालून एक शिट्टी काढावी. हे कपडे भट्टीप्रमाणे स्वच्छ होतात. शॅम्पूचे काही थेंब पाण्यामध्ये टाकून सिल्कचे कपडे भिजवावेत. तसंच, कॉटनप्रमाणे मीठ आणि लिंबाचाही उपयोग करावा. अर्धी बादली पाण्यामध्ये चमचाभर शिकेकाई आणि दोन चमचे किसलेला गूळ टाकावा. हे विरघळल्यानंतर त्यामध्ये जरीच्या साड्या ५-१० मिनिटं बुडवू ठेवाव्यात. त्यानंतर साध्या पाण्यानं धुतल्यास साड्या आणि जर चमकदार होते. लोकरीचे कपडे धुण्यासाठी डिटर्जंटचा नव्हे, तर सोल्युशनचा वापर करावा. लोकरीचे कपडे ड्रायरमध्ये सुकवू नयेत ते हलक्या हातानं पिळावेत.
मोबाइल अॅप डाउनलोड करा आणि राहा अपडेट