हैद्राबादमध्ये एका परदेशी प्रोफेसरनं एका रिक्षावाल्याला गमतीशीर पद्धतीनं धडा शिकवला. कुठल्याही प्रकारे भांडण न करता तिनं तिला हवं ते करून दाखवलं. शक्तीपेक्षा युक्ती श्रेष्ठ या न्यायाने असा लढा दिलेल्या मैत्रिणींनी त्यांचे गमतीशीर अनुभव शेअर केलेत...
फसवणूकीला मज्जाव
एकदा ठरलेल्या भाजीवाल्याकडून भाजी घेऊन घरी आले तेव्हा कुठेतरी शंका मनात येऊन गेली. भाजीवाला फसवतोय का? मग मी रोज निरीक्षण करायचं ठरवलं. पाच-सहा दिवस गेले आणि माझ्या लक्षात आलं की भाजीवाला प्रत्येक भाजीमागे एक रूपया जास्त घेतो आहे. मग मनाशी पक्क केलं याला अद्दल घडवायची. त्यासाठी मी जवळच्या मैत्रिणींना गोळा केलं आणि त्यांच्या मदतीने एक इलेक्ट्रॉनिक मशीन त्याला गिफ्ट केलं. ज्यामुळे भाजीचं बरोब्बर माप आणि पैसे ग्राहकांना कळू शकतील. माझ्या या कृतीमुळे मात्र भाजीवाल्याला त्याची चूक समजली. त्याने त्या मशीनचे पैसेही द्यायचं कबूल केलं.
सुखदा साठे, ठाणे
मौनम सर्वार्थ साधनम
रिक्षावाल्यांशी रोज रोज भांडायचा वैताग येतो. एकेदिवशी मला ठाकूर्ली स्टेशनवरून घरी जायचं होतं. माझ्या घरापर्यंत जायला मीटरप्रमाणे १७-२० रूपये होतात. मी एका रिक्षावाल्याला विचारलं पण त्याने साफ नकार दिला आणि म्हणाला 'इतना पास कौन आयेगा मॅडम?' हे ऐकून खरंतर तळपायाची आग मस्तकात गेली होती. परंतु मी 'मौनम सर्वाथ साधनम' हे तत्त्व पाळायचं ठरवलं. थेट जाऊन रिक्षात बसले आणि त्याला ओरडू दिलं. पाच मिनीटं आरडाओरडा केल्यावर मग तोच वरमला आणि शांत झाला. त्याने मला नीट घरी सोडलं. यापुढे कोणालाही न चिडता धडा शिकवायचा असं ठरवून टाकलं.
मनिषा सोहोनी, ठाकुर्ली
स्वच्छतेचा धडा
मोदींनी स्वच्छता अभियान सुरू करून बरेच महिने झाले. पण तरीही स्वच्छता दिसत नाही. मी स्वतः समाजकार्य करते. रस्त्यावर कोणी थुंकलेलं वगैरे मला अजिबात आवडत नाही. म्हणून मी एक नवीच कल्पना शोधली. जर कुणी माझ्यासमोरच एखाद्या ठिकाणी थुंकलं तर मी त्या व्यक्तीच्या मागे जाऊन उभी राहते. मग एक फोन लावायचं नाटक करते. त्या फोनवर या व्यक्तीचं नाव, उल्लेख न करता त्यांची चूक त्यांना समजेल अशा पद्धतीने बोलते. त्या माणसाला माझी युक्ती कळते पण स्वतःची चूकही लक्षात येते. त्यामुळे ते आपली चूक सुधारतात.
सुमेधा कुकडे, कल्याण
तुमची मुलगी असती तर?
एकदा मी बसने जात होते. त्यावेळी ८-१० वर्षांची एक छोटी मुलगी बसली होती. तिने कंडक्टर कडून तिकिट काढलं. पण ती छोटी बिचारी चुकीच्या बसमध्ये चढली होती. ते पाहून कंडक्टर तिच्यावर भडकला आणि बसची बेल देऊन त्या मुलीला उतरवून दिले. त्यावेळी मी मागे असल्याने काही करू शकले नाही. पण तो कंडक्टर माझ्याकडे तिकीट द्यायला आल्यावर मी त्याला शांतपणे एकच प्रश्न विचारला, 'तिच्या जागी तुमची स्वतःची मुलगी असती तर तुम्ही असंच केलं असतं का?' यावर तो कंडक्टर निरूत्तर झाला. मग बेस्टच्या अधिका-यांकडे मी त्या कंडक्टरची रितसर तक्रारही केली.
सुषमा पाथरे, गोरेगाव
युक्ती लढवली
मला एके ठिकाणी जायचं होतं. मी टॅक्सी स्टँडवर आले. तिथे उभ्या असलेल्या टॅक्सीवाल्याला पत्ता सांगितला. त्याने नकारघंटा वाजवली. तिथे दुसरीही टॅक्सी नव्हतीच. जाणं तर गरजेचंच होतं. त्यामुळे मी सरळ टॅक्सीचं दार उघडलं आणि आत बसले. तो वैतागला. त्याने बडबड सुरु केली. टॅक्सीचं दार उघडून त्याने मलाही उतरायला सांगितलं. पण मी ऐकलं नाही. उलट त्याला धमकी दिली, की माझी पोलिसांशी ओळख आहे. फोन करू का पोलिसांना? तुझं आत्तापर्यंतचं बोलणं रेकॉर्ड केलंय मी. खरंतर असं काहीच मी केलेलं नव्हतं. पण ते ऐकून टॅक्सीवाला घाबरला आणि नाईलाजाने त्याने मला इच्छित स्थळी सोडलं.
मानसी बिश्वास, कांदिवली
मोबाइल अॅप डाउनलोड करा आणि राहा अपडेट