रूपारेल कॉलेज
विद्यार्थ्यांचा विघ्नहर्ता मित्र मंडळ हे या उत्सवाचे आयोजक आहेत. या सोहळ्याचं हे दुसरं वर्ष आहे. दीड दिवसासाठी येणाऱ्या या गणरायाची प्रतिष्ठापना कॉलेज कँटीनमध्ये करण्यात येते. या बाप्पाचं विसर्जन मोठ्या दिमाखात केलं जातं. अगदी डोळे दिपवून टाकणाऱ्या अशा या सोहळ्याचं आयोजन कॉलेजमार्फत केलं जातं. दीड दिवस असणारा हा गणपती मोठ्या थाटात विसर्जित केला जातो.
बिर्ला कॉलेज
गणेशोत्सवाच्या मंगलमय वातावरणात कल्याणमधील बिर्ला कॉलेजमधील विद्यार्थ्यांनी देखील नव्या विचारांसह एकत्र येऊन बाप्पाची प्रतिष्ठापना केली. गेल्या दहा वर्षांपासून पर्यावरण विज्ञान शाखेचे व कॉलेजमधील इतर शाखेचे विद्यार्थी एकत्र येऊन बाप्पाची सेवा करतात. या वर्षी पर्यावरणपूरक अशा बाप्पाचं आगमन कॉलेजमध्ये झालं. प्लास्टिकचा पुनर्वापर करून बाप्पाची आरास सजली. टाकाऊ प्लास्टिकच्या बाटल्या, लाकडाचा भूसा, झाडाच्या पडलेल्या फांद्या, जुने कागद, माती, प्लास्टिकच्या पिशव्या, रिकामे डब्बे या सर्व गोष्टींचा वापर करून विद्यार्थ्यांनी विलोभनीय देखावा सादर बनवला आहे.
राजीव गांधी इन्स्टिट्यूट ऑफ टेक्नॉलॉजी
कॉलेजचं अभिनव मराठी वाङ्मय मंडळ सोहळ्याचे आयोजक आहेत. यंदा या उत्सवाचं आठवं वर्ष असून महादेव ही थीम ठेवण्यात आलीय. वृक्ष संवर्धनाचं महत्त्व लोकांना कळावं म्हणून ४० विविध फुलांची रोपटी ठेवण्यात आली आहेत, जी उत्सवानंतर कॉलेज अवारात लावण्यात येतील. या मंडळातर्फे गणेशोत्सव संपल्यावर वर्सोवा चौपाटीला स्वच्छता मोहीम ही राबवण्यात येणार आहे.
अथर्व कॉलेज
कॉलेजमधील गणेशाचे यंदा १८वं वर्ष आहे. ७ दिवसाचा सोहळ्यात, यंदा ‘बाहुबली’ ही थीम ठरवण्यात आलेली आहे. हा उत्सव या कॉलेजच्या सर्वात मोठ्या कार्यक्रमांमध्ये येतो. संपूर्ण उत्सव स्टूडंट काउन्सिल आयोजित करते. आगमनाला ढोल पथक बोलवण्यात येते तर विसर्जना वेळी डी जे चा थरार विद्यार्थी याना अनुभवायला मिळतो.
सरस्वती इंजिनीअरिंग कॉलेज
यंदा कॉलेजच्या उत्सवाचं अकरावं वर्ष आहे. या सगळ्याचं आयोजन विद्यार्थी करत असून कॉलेज प्रशासनाचीही विद्यार्थ्यांना मदत होते. सजावटसुद्धा साधी व पर्यावरणपुरक ठेवण्यावर भर असतो.
व्हीजेटीआय कॉलेज
साधारण १२५ वर्षांहून अधिक शैक्षणिक परंपरा असलेल्या व्हीजेटीआय कॉलेजमध्ये गेल्या ३८ वर्षांपासून गणपतीची स्थापना करण्यात येत आहे. दरवर्षी हॉस्टेलमधील विद्यार्थी मोठ्या उत्साहात गणेशोत्सव साजरा करतात. इकोफ्रेंडली गणेश मूर्ती बरोबरच यावर्षी सजावटही हॉस्टेलमधील टाकाऊ वस्तूंपासून करण्यात आली आहे.
दत्ता मेघे कॉलेज ओफ इंजिनीअरिंग
मराठी वाङ्मय मंडळ आयोजित या सोहळ्याचं यंदा २५वं वर्षं आहे. साध्या पद्धतीने पार पडणाऱ्या उत्सवाचं यंदा रौप्य महोत्सवी वर्ष असल्याने उत्सव मोठ्या दिमाखात साजरा झाल्या. दीड दिवस असलेल्या सोहळ्यात आगमनापासून ते थेट विसर्जनापर्यंत सर्वच गोष्टी मंडळातले विद्यार्थी उत्साहाने करत होते.
संकलन- मिनाक्षी शिंदे, मधुरा वालावलकर, स्मिता चव्हाण, चिन्मयी वझे, ओंकार दळवी, कॉलेज क्लब रिपोर्टर
मोबाइल अॅप डाउनलोड करा आणि राहा अपडेट