​ नौदलाच्या ‘त्या’ युनिफॉर्मने जिंकलं!

शाळेत असताना दरवर्षी आमची सहल नेली जायची. मी चौथीत असतानाची गोष्ट असेल. अशाच एका सहलीनिमित्त आम्हाला नेव्हल डॉकयार्डला नेण्यात आलं होतं. माझ्यासाठी हा सहलीचा पहिलाच अनुभव होता. मला आठवतं, तिथं नौदलाच्या युद्धनौका बघून माझे डोळे विस्फारले होते. पांढऱ्याशुभ्र कपड्यांमधले नौदलातले ते अधिकारी पाहून त्यांना सॅल्यूट करावासा वाटत होता. तो गणवेश त्यांच्यावर शोभून दिसत होता. ते चित्र आजही माझ्या डोळ्यांसमोर आहे. माझ्या डोक्यात ते फिट्ट बसलं आहे. त्यामुळे जेव्हा आई-बाबांनी मला विचारलं, ‘वाढदिवसाला तुला कसे कपडे हवेत?’ तेव्हा मी लगेचच 'नेव्हीचा युनिफॉर्म' असं उत्तर दिलं होतं.
गंमत म्हणजे त्याकाळी नेव्हीचा तो गणवेश फक्त भाड्यानं मिळायचे. काही केल्या आठ वर्षांच्या मुलाचे कपडे मिळत नव्हते. अखेर आई-बाबांनी एक दुकान शोधलं. तिथं खरं तर खऱ्याखुऱ्या नौदल अधिकाऱ्यांचे कपडे शिवून मिळायचे. अखेर आई-बाबांनी त्या दुकानदाराला माझ्यासाठी तसा युनिफॉर्म शिवून देण्यासाठी कसंबसं तयार केलं. त्यानंही आनंदानं माझा बालहट्ट पुरवला. अखेर माझ्या वाढदिवशी गिरगावातल्या आमच्या चाळीतली माझी सगळी मित्र मंडळी एकत्र जमली. मुलं-मुली फ्रॉक आणि शर्ट-पॅन्टमध्ये होते. केक कापण्याची वेळ जवळ आली आणि मग ऐटीत माझी एंट्री झाली. पांढरे शर्ट-पॅन्ट, कॅप, बेल्ट, मेडल, बूट अशा नेव्हीच्या युनिफॉर्ममध्ये मी आलो, केक कापला. अशा प्रकारे माझा वाढदिवस साजरा झाला. ‘उस युनिफॉर्म की बात ही कुछ और है!’ मला त्या गणवेशाबद्दल प्रचंड आकर्षण होतं. केवळ नौदलच नाही, तर देशासाठी प्राणांची बाजी लावणारे लष्करातले जवान, पोलिस, अग्निशमन दलाचे जवान अशा सर्वांबद्दलच मला नितांत आदर आहे.