लग्नानंतर सुरुवातीचे दिवस हे प्रत्येक जोडप्यासाठी इंद्रधनुषी रंगांचे आणि रोमांचक असतात; पण बाळाच्या आगमनानंतर दिवसाची रात्र आणि रात्रीचा दिवस कधी होतो, हेच कळत नाही. मग प्रेमाचे हे रंग फिकट व्हायला सुरुवात होते. जिथे एकमेकांनी संवाद साधायला वेळ काढायची मारामारी असते, तिथे मग ‘सेक्स’ची तर बातच नको. खरंतर ‘सेक्स’ ही गोष्ट शारीरिक गरजेपेक्षाही आधी आंतरिक भावना असते. जर ही भावना फुलवता आली, तर मग पुन्हा तो रोमांच अनुभवता येऊ शकतो; म्हणूनच बाळ असतानादेखील लग्नामधील तो ‘स्पार्क’ पुन्हा मिळवायचा असेल, तर हे नक्की करून पहा.
‘बाळ’ हा एकमेकांना जोडणारा दुवा आहे. हे लक्षात असू द्या. त्यामुळे तुम्हा दोघांना तुमची ‘स्पेस’ शोधताना अपराधीपणाची भावना बाळगण्याचं काही कारण नाही. तुम्ही पालक म्हणून कुठेही कमी पडणार नाही.
आता पूर्वीप्रमाणे सलग तीन तासांचा सिनेमा बघणं शक्य नसलं, तरी एखादी टीव्हीवरची मालिका नक्की एकत्र बघा.
दोघांनी वीकेंडला सोबतीनं एखादी सोपी पाककृती बनवा. यानं एकमेकांना ‘क्वालिटी टाइम’ देणं शक्य होईल. बाळाचं वेळापत्रक सांभाळून दोघांनी मिळून पत्ते, कॅरम असे काहीतरी खेळ खेळा. त्यामुळे जोडीदाराशी गप्पा (संवाद) होतील आणि तिच्यातील (किंवा त्याच्यामधील) लहान मुलाशी तुमची नव्यानं ओळख होईल.
नवीन आईजवळ आता वर्तमानपत्र किंवा मासिक वाचण्याचा वेळ नसतो. तेव्हा ती किचनमध्ये काम करत असताना तुम्ही एखादा छानसा लेख किंवा तत्सम काहीतरी वाचून दाखवा. यामुळे तुम्हाला तिची सोबत हवीहवीशी वाटते, असा संदेश तिच्यापर्यंत पोहोचेल.
पूर्वीसारखे त्याच्या जीभेचे चोचले वारंवार पुरवता येत नसल्याची खंत बाळगण्यापेक्षा त्याला ऑफिसमध्ये परस्पर ‘ऑनलाइन लंच’ ऑर्डर करून सरप्राइज द्या. तुम्ही बाळामध्ये व्यग्र असूनही त्याचा विचार करता हे त्याला कळू द्या.
त्यानंसुद्धा ‘डायपर्स’ महत्त्वाचे, की ‘डायमंड्स’ असा विचार करण्यापेक्षा, छोट्या छोट्या ‘सरप्राइज गिफ्ट्स’चं नियोजन करावं. मग ती गिफ्ट्स भेटकार्ड किंवा चॉकलेट्ससुद्धा असू शकतील. किमतीपेक्षा भावना महत्त्वाची. बघा तिला नक्कीच आनंद वाटेल.
दिवसातून एकदा तरी तुमचं प्रेम व्यक्त करा. त्यासाठी अगदी शून्य टक्के वेळ आणि पैसा लागतो; पण लवकरच तुमच्या जोडीदाराच्या स्वभावात याचे स्तुत्य परिणाम दिसून येतील. तिच्या वाढलेल्या वजनाकडे भिंगातून बघत बसण्यापेक्षा एकत्र सोपे व्यायाम करा. एकमेकांना वेळही देता येईल आणि स्पर्शाची नवी भाषा शिकता येईल.
घरातील विशिष्ट कामाची मक्तेदारी सैल करा. स्वतःहून जोडीदाराला त्याच्या किंवा तिच्या कामात मदत करा. मग तो प्रवास ‘लॅपटॉप टेबल’पासून किचनच्या ओट्यापर्यंत असला, तरी चालेल.
बाळाचं डायपर बदलणं असो किंवा अंघोळ, लसीकरणाचं वेळापत्रक सांभाळणं असो किंवा बागेतली फेरी, जमेल ते काम पुढाकार घेऊन सोबतीनं करा. यानं नात्यांची वीण घट्ट होईल.
छोटे विसंवाद, रुसवे, फुगवे यासाठी हिंदी - मराठी गाणी मदतीला येऊ देत. एखाद्या चपखल गाण्यानं तुम्ही तुमचे ते मनतरंग जोडीदारांपर्यंत पोहोचवू शकाल. क्षणार्धात वातावरणातील जादू अनुभवा.
सहज गंमत म्हणून एक दिवस ‘कॉपी पेस्ट डे’ पाळा. म्हणजे त्याच्या बोलण्यातील लकबी, हालचाल, सवयी तिनं उचलायच्या आणि त्यानं तिच्या... तो दिवस भन्नाट विनोदाचा आणि अविस्मरणीय आठवणींचा होऊन जाईल.
‘बाबा’ किंवा ‘आई’ म्हणून नव्या रुपात समोर आलेल्या आपल्या जोडीदाराचं कौतुक करण्याची एकही संधी सोडू नका. कधी कॅमेऱ्यात साठवून, तर कधी डोळ्यानं व्यक्त होऊन किंवा कधी चक्क थेट बोलून हे सांगा, की तू किती चांगली आई (किंवा बाबा) आहेस.
या सगळ्या भावनिक जवळीकीचं रुपांतर तुमचं ‘सेक्शुअल लाइफ’ बहरण्यातच होईल. अशानं पालकत्वाचा आस्वाद तुम्ही एक जोडपं म्हणून घेऊ शकाल आणि ‘आई - बाबा’ ही व्यक्तिरेखा साकारत असताना तुमच्यातील ‘नवरा - बायको’ कुठे मागे राहणार नाहीत.
मोबाइल अॅप डाउनलोड करा आणि राहा अपडेट