मुंबई टाइम्स टीम एखाद्यानं आपली स्तुती केली, तर तो क्षण किंवा तो दिवस आनंदात जातो. एखाद्या व्यक्तीच्या मनात स्थान मिळवण्यासाठी त्या व्यक्तीचं कौतुक करणं, हे नक्कीच प्रभावी साधन आहे. म्हणूनच एखाद्या मुलीचं मन जिंकायचं असेल, तर मुलं याच साधनाचा आधार घेतात. म्हणूनच खाली दिलेल्या काही गोष्टी वाचा आणि त्यावरून आपला निष्कर्ष काढा. १. 'आपल्या आवडीनिवडी जुळतात.' खरंच ? तुम्ही त्याला भेटलात, त्याच्याशी बोलणं वाढलं आणि बोलण्यातून तुमच्या लक्षात येऊ लागलं, की तुम्हा दोघांच्या आवडीनिवडी खूप जुळतात. त्याच्या प्रेमात पडण्यासाठी किंवा होकार देण्यासाठी हे चांगलं कारण नक्कीच असतं. आपल्या आवडीनिवडी जुळतील असा जोडीदार कोणाला नकोय; पण थांबा. आजकाल आपल्या सोशल मीडिया अकाऊंटवरून आपलं व्यक्तिमत्व, आवडीनिवडी कोणालाही कळू शकतात. म्हणून जर त्याच्या सवयी व आवडी तुमच्यासारख्या असल्या, तर त्याला त्या क्षेत्रातील वेगवेगळ्या गोष्टींवर प्रश्न विचारा, चर्चा करा. २. 'चूक तिचीच होती.' बऱ्याच पुरुषांना मी खूप आदर्श जोडीदार आहे, असं भासवण्याची सवय असते. आपल्या आधीचं नातं संपुष्टात आलं; कारण तिचीच चूक होती, हे सांगण्याचा ते आटोकाट प्रयत्न करतात. त्यासाठी काही उदाहरणंही देत राहतात. एखादी व्यक्ती असं करत असेल, तर भूतकाळ तपासून पाहा. हा त्या व्यक्तिच्या सांगण्यावर अविश्वास दाखविण्याचा मुद्दा नाही, तर आपला भविष्यकाळ सुरक्षित करण्याचा मुद्दा आहे. चार ठिकाणी चौकशी करा. ती व्यक्ती जे सांगते ते खरेच असेल, तर प्रश्न नाही. त्यात खोटेपणा आढळला, तर आपण पुढे जाणं थांबवू शकतो. त्या व्यक्तीला दूर करू शकतो. ३. 'मी एकदम फिट आहे.' पुरुषांना त्यांचा फिटनेस हा कमालीचा महत्त्वाचा वाटतो. आजकालच्या जगात सगळेच फिट असतात. काही माणसं मात्र या साऱ्याचा फक्त आव आणत असतात. 'मी रोज जिममध्ये दोन तास घाम गाळतो. एका मिनिटात ४० पुशअप्स मारतो, ट्रेडमिलवर एक तास धावतो,' वगैरे वगैरे सांगतात. स्वत: बघितल्याशिवाय अशा गोष्टींवर विश्वास ठेवू नका. ४. खोटा पगार आणि खोटा दिखावा मी रग्गड पैसा कमवतो आणि खूप श्रीमंतीत आयुष्य जागतो, असा दिखावा काहीजण करतात. कदाचित त्यामुळे मुलगी इंप्रेस होईल, असं त्यांना वाटत असतं. फक्त पैशांचं सोंग आणता येत नाही आणि हा खोटेपणा जास्त दिवस टिकत नाही, हे ते विसरतात. नुसताच दिखावा काही दिवस करता येईलही; पण त्यानंतरचं काय? तेव्हा खरी परिस्थिती समजेलच आणि असं खोटं वागणं बंदच करावं लागेल. (अनुवाद : निकिता नवले)
मोबाइल अॅप डाउनलोड करा आणि राहा अपडेट