भयभीत करोनामुळे जगभरात भीतीचं वातावरण आहे. शिक्षण-नोकरीनिमित्त अनेक भारतीय विद्यार्थी विविध देशांत राहत असून, पालकांचं लक्ष तिथे लागून राहिलं आहे. करोनामुळे त्या-त्या देशात नेमकी काय परिस्थिती आहे, तिथे करोनाला रोखण्यासाठी कशा प्रकारे काळजी घेतली जातेय याचा आंखो देखा हाल मुंटानं थेट त्या विद्यार्थ्यांकडूनच जाणून घेतला. मास्कचा खप वाढला दुबईमध्ये करोना व्हायरसचे परिणाम प्रकर्षानं जाणवत आहेत. इथले रहिवासी स्वतःची आणि आपल्या कुटुंबांची खूप काळजी घेताना दिसताहेत. तोंडावर लावला जाणारा मास्क, सॅनिटायझर इत्यादी गोष्टींचा खप आणि वापर खूप वाढला आहे. - निलय सोनपरोते, नोकरी, दुबई आणीबाणी जाहीर अमेरिकेमध्ये सरकारनं राष्ट्रीय आणीबाणी जाहीर केली आहे. त्यामुळे सरकार जे काही सांगेल ते नागरिकांनी ऐकणं भाग आहे. करोनाचा फटका अमेरिकेलाही बसला असून नागरिकांमध्ये काही प्रमाणात भीतीचं वातावरण आहे. करोनापासून संरक्षण करता यावं म्हणून ज्या उपाययोजना आहेत त्या नागरिक वापरत असून सरकारच्या प्रत्येक निर्णयात नागरिकांचा पाठिंबा मिळतो आहे. - अभिषेक कुवर, एमएस विद्यार्थी, अमेरिका काटेकोर काळजी मी सध्या जपानच्या टोकियो शहरातील सासझुका उपनगरात राहते. टोकियो चीनच्या जवळ आहे. त्यामुळे सर्वप्रथम करोनाचा फटका टोकियोलाच बसला. आधी इथे खूप भीतीचं वातावरण होतं. पण, हा तसा प्रगत देश असल्यानं आरोग्याच्या दृष्टीनं खूप काटेकोर काळजी घेतली जातेय. बाहेरचं खाणं आम्ही बंद केलं असून मी घरच्या घरी भारतीय जेवण तयार करण्यावर माझा भर आहे. - ऋतुजा कुंटे, जपान
मोबाइल अॅप डाउनलोड करा आणि राहा अपडेट